[觀眾注意]張敬軒初步確診演唱會延期

正喺會展舉行跨年演唱會嘅 張敬軒 喺27號經公司發出通告，指因自己初步確診，餘下今晚、30、31、1月1號同2號並5場演出需要延期，軒仔目前正接受隔離中。

軒仔繼早前嘅紅館表演之後，20號起喺會展再舉行11場演出，視為入行20周年紀念，其實軒仔嘅紅館騷早前已經因為疫情同社交距離措施限制多次延期，估唔到喺今次會展表演一半時佢本人亦因感染而又生支節。

主辦單位呼籲持票觀眾留意社交平台同各大媒體公佈，又向受影響觀眾致歉。

張敬軒喺中午12點幾喺IG留言向受影響嘅觀眾同台前幕後表示歉意：「對於餘下五場嘅各位已經購票嘅觀眾我覺得萬分抱歉，好多謝大家嘅支持。知道呢次有好多朋友遠道而來，或者特登撲飛，辜負咗大家心意真係好對唔住。」張敬軒又稱會盡快養好身體，另摘日子再續呢一次嘅奇妙旅程，亦向所有受影響嘅台前幕後各個單位同各界朋友致歉，多謝大家嘅包容與體諒，佢亦再一次多謝過去6場前嚟支持嘅觀眾，祝大家喺疫情之中都要身體健康，平平安安，佢更打tag指「避咗三年卒之都係中咗」，不少fans叫張敬軒唔好自責，記得好好休息。