周嘉洛透露《痞子》第二季3月中開拍 趙小婷期待明年推新歌

周嘉洛早前被影到與JW王灝兒一齊去同志酒吧消遣，呢日出席活動時，佢解釋當日係同一班人到該處慶祝《痞子殿下》打入台慶頒獎禮10強，眼見該劇咁受歡迎，而第二季《痞子》將於3月中至4月開拍，暫時劇本仍在創作中，周嘉洛透露主要係原班人馬演一個新故事。

周嘉洛聖誕同倒數於工作中度過，寓工作於娛樂，佢又同劇組交換禮物、並除夕夜一齊倒數，而同場嘅趙小婷分享新年工作計劃，期待明年推出新歌，又會嘗試做主持，佢指除夕夜將留喺屋企度過，一來佢好怕去人多嘅地方、二來疫情反覆，而趙小婷目前就讀港大內外全科醫學士Year 4，坦言兼顧工作同學業較忙，佢希望可以一take pass考試。