J2節目同志配對真人騷《仔仔一堂》呢日舉行慈善粉絲見面會，監製王賢誌率領12位參賽者一齊現身，上星期五播出最後一集，仔仔們終於要為愛表態，Ray同Kenny喺節目中成功配對，二人歡度聖誕佳節，Ray收到Kenny送嘅名貴手袋，更甜蜜放閃稱只要係另一半送嘅都鍾意。

王賢誌開心見到Ray同Kenny喺節目中由陌生變成互信互賴嘅戀人，佢笑指因為《仔仔一堂》係一年前拍攝，佢哋要發展地下情，節目又未播出，佢哋要忍住唔公開戀情，王賢誌又指幸好佢哋感情穩定：「我同佢哋講唔可以咁快透露，如果你哋睇咗就冇意思，佢哋忍得好辛苦，好在依家仲喺一齊，如果唔係，我又死畀佢哋睇。」王賢誌再次恭喜Ray同Kenny成功配對，又叫佢哋畀媒人利是。

王賢誌作為節目監製，自嘲似「媽咪」咁勞心勞力，王賢誌投訴仔仔們好難約，有時出席活動又會提佢哋時間地點，但仔仔們卻已讀不回，王賢誌只好逐個打電話去叫大家回覆，仔仔們封佢做「仔仔一堂之母」，王賢誌聞言即大笑，講到第一季口碑收視理想，王賢誌坦言考慮開拍第二季：「要唞一唞先，籌備一輯並唔容易，搵人好難，尤其今次反應咁好，點樣超越第一輯，有咩新點子要從長計議，唔可以太急。」

近日喺鑽石山發生兇案之後，當日片段圖片瘋傳，社會對慘劇都高度關注，自稱為香港抽水王嘅 林作 隨即出Post指自己有嫌犯同款跑鞋出售，不過呢次唔少人就認為佢太過火。雖然之後佢已瞬即將相關Post刪除，但係又連日多次出Post指出自己呃Like抽水「沒有任何事情是不應該被用來開玩笑的」，引起網上一片討伐。

事後林作指「堅決不為我的言論道歉」，不過星期日中午，林作任職嘅保險公司，就罕有於允許於社交平台出Post，指有理財顧問就社會悲劇作出不當言論及行為，故已終止合約。

簡短聲明又指公司內有清晰社交媒體指引，故個人言論並不代表保險公司立場。而公司內部亦有消息指，涉及被終止合約者為林作。