TVB台慶劇《輕．功》噚晚呢集講翊嵐（蔣祖曼飾）終於向爸爸十一（黎耀祥飾）坦白與Duncan（李日朗飾）分手真相，原來嵐嵐做婚前檢查時發現不育，故決定與Duncan分手，亦冇話畀Duncan知呢件事。十一問嵐嵐點解唔同Duncan坦白，嵐嵐喊住話：「佢可能冇所謂，但係我有……我知道佢爸爸媽媽好想抱孫，我睇咗幾個醫生都話冇辦法，其實我真係好想做媽咪……我細個覺得自己會係一個好老婆、好媽咪，但到頭來我兩樣都做唔到……」最後十一抱緊淚崩嘅嵐嵐安慰道：「老竇唔識講嘢，你要喊就喊啦，有老竇喺度。」場面感人!

嵐嵐終於坦白同Duncan分手真相。原來嵐嵐因為不育先忍痛同Duncan分手，佢呢句「我真係好想做媽咪」真係令人心酸。
是集另一亮點係蔣祖曼（Joman）以古裝Look登場，演開專業人士及女強人，首度拍攝古裝場口，噚晚劇情講到嵐嵐及元植（鄭俊弘飾）為志威（韋家雄飾）執導嘅電影《新輕功》拍攝先導片，兩人齊齊古裝上陣，風仔（朱敏瀚飾）則女裝上陣做嵐嵐替身，Joman受訪時坦言一直恨拍古裝：「我又諗唔到古裝造型都幾靚，同埋女俠造型都比較適合自己。」

Joman首次拍古裝，個造型又幾靚喎！Joman幾適合俠女Look！
提到劇中有少許動作戲，Joman笑言：「好彩講我個角色有啲姐手姐腳，唔係好打得，不過嚟緊都要苦練吓啲武功，希望遲啲有機會拍打戲可以更加得心應手。」Joman續指難忘被鄭俊弘用額頭硬撼後尾枕：「好記得嗰日導演叫佢唔好就住直接撼落嚟，因為我未演過動作戲，驚反應做得唔夠好，就住就住反而可能要拍好多次。最後佢真係衝埋嚟撞落我後尾枕，之後一take就搞掂，我諗佢都好痛，嗰吓反應好自然。」

鄭俊弘讚朱仔好攬。
無綫娛樂新聞台在拍攝當日到現場探班，見鄭俊弘從後攬着朱仔時露出一面冧樣，十分過癮，鄭俊弘事後受訪時笑言：「朱仔係幾好攬嘅，佢條腰好苗條，同埋膊頭又好厚喎！」同場嘅Joman則笑指朱仔古裝Look似足外籍人士：「佢一長頭髮就唔係華人樣，變咗西方人樣。」

朱仔女裝Look又幾靚女喎。

《輕．功》逢周一至五晚九點半翡翠台播映

張頴康、蔣祖曼同楊潮凱呢日各自搵咗一名親友作客全新遊戲節目《咁你都唔識》，蔣祖曼搵嚟髮型師好友助陣，而張頴康慘被4位朋友甩底，臨時搵老婆麥雅緻充當拍檔。

蔣祖曼爆玩呢個遊戲策略最重要係識講大話，佢指麥雅緻係講大話高手，張頴康笑言終於見識到老婆講大話嘅威力，對婚姻信任度出現質疑，楊潮凱呢次邀請大學師兄出戰玩遊戲，佢笑指反被對方拖累，不過楊潮凱稱整個過程開心又好玩。