柳冕分享與囝囝感人互動 肥媽聽完流晒眼淚

由於節目調動關係，嚟緊1月1日播出嘅《中年好聲音》，將於 22:00喺翡翠台播出。元旦夜呢一集，將會上演第二部曲《挑戰！兩個只能活一個》嘅最終回，50強入面最後嘅15位選手，將出戰爭奪剩餘嘅8個出線名額！

而上回合獻唱《無言感激》嘅殘障人士柳冕，佢嘅演出感動咗唔少網友，今集柳冕將會獻唱林子祥嘅《擁抱》，仲獲得伍仲衡同呂方力讚，後者仲話柳冕唱歌嘅感覺就好似係講緊故事咁，令人聽得好舒服。柳冕亦有分享自己同囝囝嘅窩心故事，佢話以夢送囝囝返學，因為唔想個仔畀人笑佢有個殘障爸爸，所以永遠都早一條街放低佢，等外傭姐姐放囝囝去到學校門口。直到有一次柳冕去接囝囝放學，囝囝完全唔介意咁同同學仔介意：「呢個係我爸爸」，柳冕話當時聽到個仔咁講好感動，亦係佢願意重新登上舞台嘅原因：「我個仔都唔介意，點解我要介意人哋眼光？」呢個咁洋蔥嘅故事，感性嘅肥媽當然係聽到流晒眼淚啦！

另外喺網上人氣高企嘅顏志恒亦會喺今集登場，佢畀主持車婉婉踢爆係「傳聞中冇人敢挑戰選手」，而呢集佢將會以歌神張學友嘅《我應該》嚟出戰，想知佢實力係咪咁勁？星期日元旦夜記得留意收睇啦！