李佳芯、吳偉豪、徐榮、張國強及陳庭欣等呢日為劇集《有種好男人》宣傳造勢,佢哋喺專業教練指導下,挑戰唔同嘅高難度動作。
飾演母子嘅李佳芯同吳偉豪戲裡戲外都好合拍,李佳芯一聽到要做雙人動作,譬如一字馬、倒豎葱同巴黎鐵塔,佢聽到嗰陣都幾驚,好在有教練指導,李佳芯覺得都OK!吳偉豪講過跟李佳芯演母子似「前世情人」,笑言有時「前世情人」都會做錯嘢得罪阿媽,李佳芯拍完呢套劇笑言後悔冇早啲生小朋友:「早知我早啲生,就有一個咁大嘅仔陪我玩。」
陳庭欣喺劇中大晒美腿色誘馬德鐘:「起初係跟劇本寫去演,但係現場試過係有難度,試咗幾次,睇吓點樣先做到嗰個感覺冇咁假,當然逼男友睇,我阿爸阿媽、Benny、鸚鵡同狗全部都要睇,冇呀!冇回應!我隻腿佢哋都見過。」陳庭欣指12月31號本來準備睇張敬軒演唱會,可惜軒仔病咗,只好等其康復,所以陳庭欣決定留喺屋企倒數。
張國強喺劇中艷福不淺,被封為風流富豪,與不同女性周旋,佢大讚李佳芯演技唔錯,講佢哋喺沙灘欣賞名畫嗰場,呈現到對藝術嘅嚮往,出嚟嘅效果幾浪漫,張國強今次演出跟以往形象截然不同,佢笑言太太評語係「估唔到你可以做到」,希望觀眾都會鍾意。
登入後即可查看我的收藏
登入後即可查看瀏覽記錄