因為愛情|疫情分隔夫妻愛女 三年團圓幸福滿載

因為愛情|疫情分隔夫妻愛女 三年團圓幸福滿載

為觀眾訪問咗多個特別愛情故事主角嘅《因為愛情》,而30號播出嘅第4個故事主角,係因疫情分隔香港同台灣兩地嘅阿恩同Jason。透過朋友介紹認識嘅佢哋,經過一個月密集式通話後,相約喺台灣旅行見面,之後亦認定對方,仲先後誕下兩名女兒。

原本佢哋對未來生活一早已經有更多藍圖,可惜因為疫情,令佢哋三年前開始被逼分隔兩地,兩歲半嘅細女更從未真正見過Daddy,一家四口只靠一至兩個月一次嘅視像通話「見面」拉近距離。

阿恩同Jason喺疫下只能夠靠視像聯絡

本來憧憬嫁人後有膊頭可以依靠嘅阿恩,因為呢個改變重拾堅強鬥志,用盡千方百計「一拖二」湊大囡囡,更放棄原本熱愛嘅舞台劇幕後工作騰出更多時間照顧小朋友。唔少人認為吠緊牙關就一定非常痛苦,但係即使付出再多,阿恩依然保持正面樂觀:「再難都只係一個過程,見招拆招囉。我覺得人生到老一定有一啲缺席率,或者會有啲小意外發生,呢個就係人生。」

要一拖二照顧兩位小朋友一啲都唔易,可幸長女乖巧又懂事

皇天不負有心人,阿恩同小朋友終於等到撥開雲霧嘅日子,喺製作組同Shiga陪伴下,為踏上飛往台灣團聚嘅旅程作最後準備。阿恩嘅獨立勇敢仲有大女嘅懂事,令Shiga深受感動,佢話:「我細個冇阿恩個大女咁生性,佢知道媽媽要照顧妹妹,佢唔會出聲同呷醋。但當我5歲時,我係唔明白點解媽媽由朝到晚都要返工,點解唔可以早啲返嚟屋企,我好深刻喺我五歲嗰時,我發過一次好大嘅脾氣,我問媽咪:『點解你要出去做嘢,點解你唔可以陪我?』我話我唔要錢呀,我淨係要媽咪!依家大個明白咗,諗番轉頭就會覺得自己原來係咁衰。」

Shiga又透露自己曾經歷過一次異地戀,不過經驗並不愉快: 「對方去咗美國讀大學,好快我就知道唔係好適合異地戀。首先要各自都好獨立,雖然生活上有好多嘢我可以處理,但我喺情感上係會幾依賴另一半,需要感受到對方喺我面前,當然依家科技好發達可以視像,但我成日覺得隔住個Mon感覺係唔同嘅。」 

Shiga深受阿恩嘅付出感動,仲分享自己過往嘅一段Long D感受

而2號晚播出嘅一集,製作組將會直擊「恩Son」台灣重逢嘅生活,相愛嘅人分隔兩地足足3年再重逢,喜悅絕對係預料之內,但係原來佢哋背後各自埋藏不少憂慮,到底佢哋可唔可以一一化解呢?

《因為愛情》星期一至五晚 22:30 J2(82台)

盧廣仲相隔13年再來港舉行演唱會 預告騷後將投入新專輯製作

台灣三金天王盧廣仲相隔13年再喺香港舉行演唱會,濶別紅館多年再次重返呢個舞台,令盧廣仲相當興奮,呢晚佢連唱多首經典歌,又同樂隊一齊自彈自唱,令歌迷聽到如痴如醉。

完成演唱會後,盧廣仲隨即就要投入新專輯嘅製作,佢仲引用詩人無名嘅一句說話「在是非對錯等想法之外,還有一大片的原野」,盧廣仲話自己會喺呢片原野上等住歌迷們,希望喺未來佢嘅音樂同新專輯,可以繼續為大家喺呢片原野上,提供新鮮嘅空氣。

 相關推薦

熱門搜尋