台慶頒獎禮前瞻｜最佳主持十強現身 貝兒尋冧莊阿Bob豐收年

TVB年度壓軸盛事《萬千星輝頒獎典禮2022》，星期日晚就隆重舉行，當中16個組別各個獎項嘅提名藝人，已先後盛裝雲集電視城拍攝官方場刊， TVB娛樂新聞台 一直全程直擊拍攝花絮，今晚起會一連五晚播出「頒獎典禮」系列，同提名藝人暢談候選心情仲有獲獎信心。

今晚「出場」嘅將會係最佳男、女主持十強候選人，入圍者競爭激烈，女主持候選人除咗包括有縱橫主持界逾50載，先後憑《荃加福祿壽》、《Sunday靚聲王》同《娛樂大家》三獲「最佳節目主持」嘅 汪明荃 ，今年再憑《星光匯聚成翡翠》衝擊獎項；2021年嘅「最佳女主持」得主陳貝兒，今年亦有機會再憑《無窮之路 II-無價之保》再下一城。

而盛產靚女主持嘅《東張西望》亦有 陳庭欣 吳幸美 同 朱凱婷 參與角逐，其中 吳幸美 憑藉節目嘅高人氣加上《好聲好戲》贏得唔少掌聲，競爭力不容忽視。

而曾憑《走過浮華大地亞洲篇》同埋《Do姐再Shopping》獲主持獎項嘅 黃翠如 ，對今年再憑《遊走世界天與地》提名女主持獎，翠如就話今年會以參加派對嘅心情出席喇：「我最開心係個名單入面有方東昇，我未見過佢真人。」仲話想同幽默風趣嘅對方合照呀。有份入圍嘅 賴慰玲 就笑言對獲提名感到奇怪喎，而一眾提名女主持中，就以陳庭欣最為搶鏡喇。

而男主持方面，首度提名主持組別嘅 林盛斌  拍攝期間全程笑到見牙唔見眼；今年分別提名「最佳男主持」、「最佳男配角」仲有「最受歡迎電視拍檔」嘅Bob仲話今年已經係大豐收，仲謙稱自己未夠資歷，又話更希望有份參與嘅《360 秒人生課堂》同《美麗戰場》能奪得團體獎呀。

除咗阿Bob之外，我哋亦訪問咗 森美 黎諾懿 梁思浩 同 阮兆祥，不過大家都對獲獎抱平常心，而一向搞慣爛Gag嘅森美，受訪期間仲不斷向黎諾懿派高帽呀。

《萬千星輝頒獎典禮2022》1月8號晚 20:00 翡翠台