JJ賈曉晨慶結婚7周年 樊少皇深夜突叫離婚？！

擁有一雙迷人電眼加好身材嘅 JJ賈曉晨 同老公樊少皇近年主力留喺內地工作生活。而JJ同少皇日前先公開自己終於擺脫陽性康復，1月1號又喺社交平台出Post，慶祝同老公結婚7周年，點知夜晚樊少皇就連出幾個Post聲言離婚，嚇到唔少網友眼都突埋呀。

JJ元旦出Post貼出夫妻相擁嘅甜蜜照片，慶祝新一年來臨同時亦都係佢同樊少皇結婚嘅7周年，而少皇亦都轉發呢個Post，但係留言就牛頭唔搭馬嘴，第一次寫：「我們離婚吧」，之後又改做「我們」兩個字，最後先改為「我們換個冬天不冷的地方生活吧」。

有網友發現就嚇一嚇，以為佢結婚紀念叫離婚咁絕，又有人估會唔會係語音輸入，又或者係相關字作怪喇，定真係因為內地天氣太凍，口震震讀極都錯，又手震出埋Post呢？

但係「出事」成大半日喇，佢哋雙方都仲未有回應，希望只係真係一時搞錯啦。