叱咤頒獎禮｜So Ching復工精神不俗 欣宜蟬聯雙冠王感激同事

樂壇最公開一張成績表，《2022年度叱咤樂壇流行榜頒獎典禮》元旦日舉行，當中因為紅館嚴重事故，事後一直陪伴重傷舞蹈員男友阿Mo李啟言嘅女團COLLAR成員蘇芷晴，呢日亦正式歸隊復工首次現身，佢亦都講到自己重回幕前係阿Mo樂見嘅事。

So Ching話喺阿Mo接受治療同康復嘅過程當中，自己重投工作係對佢同阿Mo嘅一大動力，亦深信阿Mo一定會永復，希望大家繼續為阿Mo嘅祈禱。佢又提到經過5個多月之後，阿Mo傷勢已經越見穩定，所以經過討論後決定重返幕前同大家見面，亦會繼續一齊積極面對往後嘅路。

而成為首位連續兩年獲得女歌手金獎，又同時得到我最喜愛女歌手蟬聯雙冠王嘅 鄭欣宜，喺台上攞獎時已經非常激動，事後佢就話要多謝一直為自己出心出力嘅團隊努力嘅成果喇。

同樣喺台上非常激動嘅，仲有入行17年首度獲得叱咤女歌手獎項嘅 泳兒 ，呢日佢嘅戰衣仲非常性感呀。而 謝安琪 呢日獲獎時就透露90高齡嘅爸爸近日入院，令佢非常感觸，佢仲話非常擔心爸爸會逐漸喪失記憶，所以令佢非常擔心。

MC張天賦一曲《小心地滑》今年唱到街知巷聞，而提到早前有Youtuber指佢同女友同遊超市一事，正式向佢道歉，呢日佢就話唔需要再作回應，亦認為事件冇特別影響自己呀。陳蕾 呢晚同樣獲歌曲獎，不過就因為服裝問題令表演失準，事後佢仲似乎非常失望，仲話下次唔會要靚唔要命呀。