大劉再開記者會 與呂麗君撇清關係 詳述財產安排 爆解多年都市傳說

早前同現已改名為呂姵霖嘅舊愛呂麗君一同現身商場，被部份人形容為一同出遊，甚至傳出復合嘅富商劉鑾雄，繼日前發聲明澄清同對方只係商業合作未有任何其他關係之後，1月3號亦再次召開記者會，期間傳媒只可以拍照同錄音。

大批傳媒一早齊集喺大劉位於銅鑼灣嘅辦公室，而大劉喺記者會再次重申同呂姵霖早已分手，指商場短片流出當日係應對方求助簽署商業文件，落樓就被拍攝，而鬧「踎地男」就係因為自己接受腎臟移殖手術之後非常擔心會被感染，當時因為同對方距離接近，所以要求對方起身離開。佢又指自己已接受5針疫苗注射，不過醫生指自己身體依然虛弱，抵抗力只得正常人3、4成。

佢又指蕭若元最近喺影片講述事件，又自稱同佢非常相熟，事實只係見過一次面，不過認為對方係為吸引收視而哇眾取寵。至於因為當日影片發聲明一事，佢就話當日同呂姵霖喺商場出現時，見到有人以相機拍攝佢同對方同行，唔想有人誤會造謠復合而大做文章，事後更有人喺網上傳出同對方復合嘅消息，更指相關傳聞已經傳出8年之久。

佢之後又向現場傳媒解開多年來嘅「都市傳說」，詢問完記者任職年資之後，佢話所謂嘅「春卷傳聞」並非事實，又話「莫講話冇做過，有諗過都絕子絕孫，又話塞春卷、又話乒乓波、又話網球，再遲啲就話欖球」，指自己有打算澄清，不過認為難以杜絕傳聞。

佢又指有電視劇劇情影射佢喺飛機上鬧喊空姐，之後就以支票解決事件，佢亦都否認類似情況發生過。更指不斷有唔同傳聞，痛苦外人難以理解，佢認為自己只係「多幾個女朋友，唔使攞綜緩，唔係住劏房，啲人就唔妥你喇」。

大劉又安排法律人員再喺現場宣讀一次日前發出嘅公開聲明，之後就將自己嘅財產安排詳細公開，指財產除咗會交予太太甘比陳凱韻之外，亦包括其他家人同子女，以免外界誤會甘比同子女獨攬佢所有財產。佢又提到同前妻寶詠琴所生嘅長子劉鳴煒已經42歲，自己非常滿意同開心佢做大量慈善工作。

大劉指同甘比結婚後約兩年決定處理財產，當時同律師討論後，發現財產受信託管轄仍可能會發生爭拗打官司情況，故決定「派晒出去，寧願俾錯人，都好過益啲極壞極壞極壞極壞嘅恐怖份子。」

佢又指過去8年一直受網上打手困擾，「好多人鍾意用網絡歌頌自己，踩人」，又指網上傳出佢同甘比結婚，係因為甘比母親捐賢之後報恩，大劉指「如果唔係某某人傳，我批個頭俾你當櫈坐」，佢繼續話「我要換腎都搵個後生啲啦，60歲人仲搵個老腎換？」

佢又話考慮到呂小姐一對20同12歲嘅子女，先決定出手幫助，唔想有往後有難堪情況影響一對小朋友，所以為子女決定為對方保留一啲尊嚴。佢又指有人不斷挑戰自己底線，「就算我係占士邦，有License to Kill，有我都唔會咁做，我都要考慮仔女嘅問題，但係我都要保護我自己同埋陳凱韻，仲有3個仔女，仲有其他嘅仔女。我梗係要預防啦，我哋嘅特首李家超點講呀？害人之心不可有，不過防人之心亦不可無，希望記者會之後有人會收歛啲。如果再有其他新聞，大家可以打俾我。」

「其實好sad，我見過好多朋友天生嘅性格唔會改，到死都唔會改，咁我能夠做咩？我只係一個普通人，只能夠黯然接受。」

之後嘅提問時間，大劉拒絕解答呂姵霖所提出嘅「困難」詳細內容，佢話：「我做人今日留一線，他朝好相見，我更加唔會趕盡殺絕任何人，唔係淨係呂小姐，任何人我都唔會，大家娛樂版可能比較少留意財經、金融、地產，如果有嘅話相信你哋就好快會知喇，我唔方便講。其實唔係為咗個仔同個女，我都極度唔想幫。」

佢又指唔要要求蕭若元收回失實言論，「咁係仲益咗佢，雖然我台灣都識好多朋友，今日我都叫搵到碗稀粥食，但我唔想我嘅第二代、第三代生仔冇屎忽。」「我慶幸由借我外母15萬到今日，唔敢講搵好多，不過有兩餐安樂茶飯食，你問我借唔會採取法律行動？唔會，但係如果再繼續講，我就可能會打擊佢嘅平台，令佢冇晒信用。」「我諒解佢，搵到食使乜咁吖，如果到我有一日要咁樣呃like呀，咁我就大x鑊啦。」「我最鍾意邊個最愛邊個你又知嘅？我自己都未知呀咁多位，仲話知我最鍾意邊個」。

至於問到呂姵霖他日再提出求助，同他日同子女見面會唔會有問題時，大劉話：「我開記者會已經預計晒所有後果，我讀書唔多，不過兵來將擋水來土掩，人人都有choice去決定，不過我冇。」至於同呂一對子女有冇見面，佢思考一段時間之後話：「8年前都見到好密嘅，不過8年前發生一件事，牽涉到錢嘅，因為錢就露出咗佢嘅九尾狐，所以我哋就用咗好多法律嘅方法去解決所有嘢，自從嗰次之後佢就好少好少俾仔女同我見面。」

「咁而家因為我肯去幫之後，就見多咗，但係我見面都要好小心保護自己。有一次我同個女講，我話『爸爸同你行街，睇吓有咩衫爸爸陪你睇』，佢阿媽就打嚟，話佢鍾意我陪埋佢揀，咁我唔掣喇，費事啲Sales以為又話復合。我會盡我能力照顧兩個細路。」

而被問到呂喺佢心中嘅印象時，大劉亦拒絕作答：「關於呂小姐嘅問題，我真係唔方便comment，因為一講七七四十九日都講唔完，大家可能要喺到紮營，第二陳小姐有冇嬲或者唔開心，我可以好簡單咁答你，邊值得啫？佢又知咩事。」

之後轉到其他話題，好似外間一直傳聞大劉非常照顧舊女友，大劉話：「有啲係有助養，但係唔係全部，值得我贊助支持我就會做，唔係個個係喎。我唔怕講兩、三年前匯咗一筆天文數字俾53年前嘅女朋友，佢值得嘛，有啲冇良心嘅，有啲賤到無倫嘅，娛樂圈都有唔少。」

「以前我有個女朋友，兩姊妹夾埋冒簽我名，整張假文件去電油公司申請張油卡，佢好彩被會計俾check到，我都冇去報警，如果報佢衰梗，淨係提佢，如果報警佢死硬，我都冇做到。」

佢又再爆當年嘅另一迷思：「尖沙嘴嘅The One個名係我仔劉鳴煒改嘅，我本人喺任何思想任何環境之下，都未諗過呢個字出嚟。私人工作上都冇諗過呢個字出嚟，我好肯幫人，不過有啲人交個廣告稿嚟叫我登，我都會照幫手嘅。就係借我秘書去呃個老襯囉。」

有記者笑言大劉可以自設影片平台爆料，佢就笑住話點擊隨時過億，不過擔心黑客而作罷。之後佢又提到更多小故事：「結咗婚兩、三年，一年都同我攞幾個鱷魚皮有鑽石嗰啲手袋啦。」