劉鑾雄記者會｜大劉開記招盡爆心中情 舊愛爭端家產安排都市傳聞講足個半鐘

富商大劉劉鑾雄繼日前發聲明，指同2014年正式分手，已改名為呂姵琳嘅舊愛呂麗君並無復合之後，1月3號又召開記者會，接近個半鐘嘅過程當中，大劉先係再重申與呂姵霖只係一對子女嘅父母，並無其他關係，又暗示有人遇上大麻煩而向佢求助，為咗一對子女先出手相助。

綜合大劉嘅發言，佢指「8年前」開始就一直受謠言困擾，當中造謠者呼之欲出，佢仲話開記者會係為咗向外界說明情況，各大傳媒對佢感情關係有疑問，可以隨時查詢咁話。

佢又指自己處理財產，已經安排包括所有子女同太太甘比陳凱韻，並非被甘比同三名子女獨攬。亦澄清外傳娶甘比為妻係因為其母向佢捐腎一說係子虛烏有，期間繼續佢嘅幽默抵死作風。

外傳大劉喺御用酒家嘅「塞春卷」傳聞，佢亦都直接回應，指從未有其事，更加諗都唔敢諗。而一向對舊女友有情有義嘅傳聞，佢亦都直接回應，除咗話有姊妹冒簽開油卡騙取電油錢之外，仲指有人婚後都繼續向佢索要名貴特別限量手袋。

當年大劉重建尖沙嘴黃金地段商廈，之彼被命名為「The One」成為外界另一「童話故事」，呢日佢就笑言，係有人向佢提供廣告稿，要求以佢名義向報章刊登，而事質上大樓係由佢嘅大仔劉鳴煒仲名，自己從未參與，至於點解當事人有咁嘅要求，大劉就答話：「借我秘書去呃個老襯囉」。

而每日喺網上評論時政，被網友奉為名燈嘅 蕭若元，近日都以大劉嘅事件作為題材，仲話同大劉有一定交情，不過大劉呢日就直接話只係同蕭生見面一次，但係明白對方為搵食，唔會向佢採取行動咁話喇。