劇集《輕．功》唔經唔覺已經踏入結局篇，呢日一眾演員一齊現身最後一次宣傳，而劇內劇外都係好姊妹嘅 蔣祖曼 同 朱晨麗 就話非常唔捨得，私下都有繼續再約見面咁話喇。至於現身短短時間嘅 龔慈恩 就即時扮呷醋，非常可愛呀。

活動見到佢哋全部打成一片，而佢哋就話拍攝之後大家都成為好朋友，Joman仲話最懷念拍攝時 韋家雄 通宵邊等埋位邊講鬼故，想瞓都唔敢瞓呀。

除咗向現場觀眾派小禮物之外， 周志康 鄭俊弘 同 麥皓兒 佢哋呢日仲喺現場為大家唱歌，其中就連韋家雄都有參與，唱功仲非常唔錯呀。呢位唔使瞓又成日講鬼故嘅好拍檔，仲被阿Fred大讚夠哂風趣幽默，有佢喺到一定冇悶場，成為大家嘅開心果呀。

有份客串演出之餘今次仲獻唱插曲，麥皓兒就話非常開心，仲要多謝監製信任自己呀。而阿康就讚呢位拍檔夠晒樂觀，佢哋仲即場研究合作Jam歌呀。

今個星期踏入結局周嘅《輕．功》劇情愈見肉緊，劇情講到何索 龔慈恩 疑再次出賣志威 韋家雄 ，將《新輕功》劇本北上推銷，激到編劇錦賢 歐瑞偉 暈倒入院，其間元植 鄭俊弘 一直陪伴在側。但係錦賢昏迷前曾叫咗元植一聲「乖仔」，加上甦醒後又指元植媽媽曾報夢叫自己好好照顧佢，令元植誤會錦賢先係親生爸爸。

後來醫生指錦賢突發性肝炎，急需做肝臟移植手術，元植即緊張抽血檢查希望捐肝，但係結果顯示佢哋絕非父子關係，大感失望嘅元植向師傅十一 黎耀祥 哭訴：「好想錦賢叔係我爸爸，點解我唔可以有個好爸爸，如果錦賢係我爸爸，媽媽就唔使一個人養我咁辛苦，佢就可能唔使咁早死……」

Fred透露將自身經歷投入喺呢場戲拍攝

Fred喺呢場接近3分鐘嘅喊戲演繹甚有感染力，而現實中嘅Fred同生父一樣自細就未有聯絡，長大後雖然曾主動聯絡亦有過幾面之緣，可惜最終再次失去音訊。 Fred受訪時透露，呢場喊戲喺清晨6點拍攝，當時仲因為台前幕後都準備收工，令自己非常大壓力，好在喺祥哥同導演協助下，阿Fred兩Take就完成，佢話：「拍之前冇乜點同祥哥傾偈，因為想盡力投入個角色同培養情緒，拍完之後祥哥有分享佢拍喊戲嘅經歷畀我聽，好多謝佢。」至於現實同角色經歷相似，Fred坦言有以親身經歷代入角色。

另一邊廂，韋家雄同 楊卓娜 呢對CP就戀情告急。經過檢驗後，發現只有志威適合捐肝予錦賢，令到原本打算拍完《新輕功》後就同女友嘉嘉 楊卓娜 移民嘅志威非常困擾，亦唔知點樣向嘉嘉交代。之後佢終鼓起勇氣坦白，但嘉嘉聞言表現激動，仲話最失望係志威事前冇同佢商量。

嘉嘉爆喊話：「你究竟有冇當我係你女朋友，有冇諗過要尊重我架？！」最終嘉嘉仲狠心提出分手。喊功出名了得嘅卓娜於喺呢場分手戲表現投入，仲激動到青筋暴現。佢受訪時仲話呢場 戲一Take過完成，更笑言最驚就係同家雄拍感情戲：「我每次見到佢淨係想笑，我好驚喊唔出，因為Roll機前一分鐘都仲係不停咁笑緊！佢成日都講埋啲唔三唔四嘅嘢，就算佢冇講我都覺得佢係講緊。」

家雄同卓娜因為捐肝問題導致分手

今次佢同家雄繼《大醬園》後再演情侶，卓娜就指大家默契十足： 「同家雄合作好開心，每次都有好多火花，一埋位就已經撻得着。其實我一入行已經識得佢，所以對大家都好有信心。」