TVB收視｜聖誕周劇集收視全線上升 綜藝節目繼續吸引觀眾收睇

TVB各個節目喺聖誕周期間收視繼續保持穩定，未受觀眾嘅慶祝活動影響。資訊節目《東張西望 》持續強勢，跨平台直播收視最高25.2點(164萬觀眾)，比上周升2.1點，續踞上周收視榜首位置。

而各線劇集收視亦同步全線上升，處境劇《愛·回家之開心速遞》， 最高收視23.1點(150萬觀眾)，升0.9點；而上周推出，由馬德鐘、李佳芯主演嘅全新劇集《有種好男人》首播成績不俗，最高收視22.6點(147觀眾)，升0.8點；《輕．功》最高收視19.8點(129萬觀眾)，升1.7 點。

至於綜藝節目方面，拍攝一班藝人重遊兒時長大舊地嘅節目《回家》，打頭陣出場嘅謝君豪回到彩虹邨，重遇小學同學一集，最高收視14.9點(96.5萬觀眾)，升 1.4 點。 而喺大除夕播出嘅《豪遊咖啡》最高收視16.9點(110萬觀眾)；《羅文傳承20周年全城紀念演唱會》，由多位歌手分別演繹羅文名曲，最高收視16點(104萬觀眾)。

大除夕倒數特備節目《福佑香江 同心邁向2023》，直播寶蓮禪寺叩鐘，廣大觀眾可以安坐家中倒數，一同感受新一年來臨氣氛，最高收視13.7點(89.1萬觀眾)，成績不俗。元旦日新年伊始，1.5小時特別版《開心無敵獎門人終極篇》最高收視22.1點(142 萬觀眾)，緊接嘅《中年 好聲音》26強順利誕生，最高收視17.3點(111萬觀眾)，繼續取得不錯成績。