顧嘉煇離世｜《上海灘》傳遍全球華人 《獅子山下》頌港人堅忍

創作無數膾炙人口經典粵語歌曲嘅知名音樂家 顧嘉煇 1月3號喺加拿大離世，享年92歲。

顧嘉煇 上世紀30年代喺廣州出生，自細就對繪畫有極高天份，後來因為戰亂被家人安排往澳門讀書，之後一家人輾轉移居香港。初時顧家居於環境惡劣嘅木屋區，靠家姐顧媚擔任歌手維持生活，呢個時候顧嘉煇而因而開始對音樂產生興趣，逐漸成為一位音樂人。

1961年顧嘉煇參與邵氏舉辦嘅音樂比賽，以創作嘅《夢》正式展開音樂生涯，開始為多部電影作曲。其後仲獲 邵逸夫 同 方逸華 資助留學美國進修音樂，潘迪華亦資助嘉煇哥到英國觀摩大量音樂劇。

學成後嘉煇哥應邀加入TVB，為當時爆發式發展嘅電視劇集擔任作曲工作，更兼任音樂綜藝節目《聲寶之夜》評判、《歡樂今宵》音樂總監等等。

不過最令人熟悉嘅，絕對係嘉煇哥多年來創作嘅無數經典劇集歌曲，無論《啼笑因緣》、《田園春夢》、《狂潮》、《家變》、《奮鬥》、《親情》、《獅子山下》、《網中人》、《京華春夢》、《輪流轉》、《上海灘》、《倆忘煙水裏》、《萬水千山縱橫》、《今晚夜》、《忘盡心中情》、《世間始終你好》等等數之不盡，直到今日仍廣為歌手獻唱。

唔少歌曲都由佢同另一鬼才 黃霑 合作曲詞，兩人堪稱最佳拍檔，亦多次以金曲開辦演唱會，例必座無虛席。90年代起嘉煇哥逐步淡出，移居加國，但係不時返港同朋友見面，亦為觀眾舉辦唔少表演。

無綫電視獲悉噩耗之後發稿，向嘉煇哥家人致慰問，同時再次感謝嘉煇哥多年來為無綫同本地音樂界嘅貢獻。