踏入結局周嘅《輕．功》劇情再現轉折，被觀眾鬧爆嘅「絕世港女」 Chloe 簡淑兒 再度現身，仲帶住啱啱出世嘅BB同阿風 朱敏瀚 見面。風仔問到Chloe點解手上會綁住繃帶時，Chloe 口震震指老公 周志康 發現BB唔係親生骨肉，仲被丈夫同家人下令離婚。

善良嘅風仔對Chloe嘅說詞照單全收

一臉愕然嘅阿風即追問Chloe：「BB係我嘅？」而Chloe只係默默點頭，仲流淚自爆因患產後抑鬱曾割脈自殺，仲話想離港散心；覺得Chloe非常可憐嘅阿風，之後仲主動提出照顧BB。點知鏡頭一轉，Chloe媽媽 韓馬利 原來一直藏身喺餐廳外，仲奸爆向Chloe話： 「都估到個傻仔會要個BB架喇，賣仔勿摸頭呀，諗吓將來嘅日子點過好過啦！」

一直喺車內旁觀嘅Choe媽一番話，似乎就有啲內情咁

最後Chloe爆喊望住阿風抱BB離開，而無啦啦添丁嘅「洪家」，同步亦有唔少事發生， 先係嵐嵐 蔣祖曼 覺得阿風再被Chloe欺騙提出驗DNA，可惜阿風一意孤行要湊大BB；而十一 黎耀祥 對阿風嘅前景亦非常擔心，仲考慮復出參演《新輕功》，實行「阿爺」努力賺錢幫補阿風同「孫仔」。

朱敏瀚 受訪時，就話雖然唔係首次同BB合作演戲，不過一開始拍攝時仍相當「捩棄」，佢話：「今次係同BB最多戲份嘅一次，基本上每一場都係用真B去拍。第一日拍嘅時候抱親佢都喊，但 朱晨麗 抱佢又冇嘢喎，好有挫敗感。 後來研究到呢個BB有個瞓覺姿勢係舒服啲，之後就愈拍愈順利，對住BB都愈嚟愈冧，覺得自己好似奶爸咁。」 

朱仔續指同劇中囝囝非常有緣分，佢話：「佢喺《回歸光影頌：我的驕傲》入面係做我嘅BB 版，同埋要讚一吓BB，佢好似出世就係為咗拍嘢咁，好識得咩時候笑咩時候喊，我都同BB媽咪攞咗聯絡，等BB大個啲可以再見面。」

BB同朱仔非常有緣，早前就扮演過朱仔BB版，今次更加演一對父子

而首次扮演爸爸嘅佢，心中又嚮往做爸爸未呢？朱仔就笑言：「拍《輕．功》呢個過程，對住呢個BB係增強咗我生B呢個諗法， 因為望住BB真係會好冧，有唔介意咩都畀晒佢嘅感覺。」

《輕．功》最新一集，劇情說到翊嵐（蔣祖曼飾）終於向爸爸十一（黎耀祥飾）坦白與Duncan（李日朗飾）分手真相，原來嵐嵐做婚前檢查時發現不育，故決定與Duncan分手，亦沒有告訴Duncan這件事。十一問嵐嵐為何不和Duncan坦白，嵐嵐哭着說：「佢可能冇所謂，但係我有…我知道佢爸爸媽媽好想抱孫，我睇咗幾個醫生都話冇辦法，我真係好想做媽咪…我細個覺得自己會係一個好老婆、好媽咪，但到頭來我兩樣都做唔到……」最後十一抱緊淚崩的女兒安慰道：「老竇唔識講嘢，你要喊就喊啦，有老竇喺度。」場面感人。

是集另一亮點，是蔣祖曼（Joman）以古裝Look登場，演開專業人士及女強人的她更是首度拍攝古裝場口。嵐嵐及元植（鄭俊弘飾）為志威（韋家雄飾）執導的電影《新輕功》拍攝先導片，兩人齊齊以古裝上陣，風仔（朱敏瀚飾）則女裝上陣做嵐嵐替身。Joman坦言一直恨拍古裝：「意想不到我個古裝造型幾靚，同埋女俠造型都比較適合自己。」

提到劇中有少許動作戲，Joman笑言：「好彩講我角色有啲姐手姐腳，唔係好打得，嚟緊都要苦練吓啲武功，希望遲啲有機會拍打戲可以更加得心應手。」