因為愛情｜兩位Carmen兩段不凡經歷 意外傷殘老年喪夫靠愛見光明

J2 節目《因為愛情》一連兩集嘅唔同故事主角不約而同叫Carmen，佢哋兩人嘅故事感人之餘亦相當非一般。4號晚嘅主角Carmen，二十年前因為一宗喺外地發生嘅交通意外導致永久傷殘。

面對茫茫前路，Carmen當時作出一個狠心決定，從男友Eric嘅世界中完全消失。Carmen憶述：「我唔知佢知道咗會有咩反應，我當時望住天花板完全郁唔到，諗唔到將來，連下一秒會點都唔知，愛情呢樣嘢已經好奢侈。」

不過「因為愛情」，Eric鍥而不捨越洋尋找摯愛，最終以誠意打動孤身處於復康路上嘅 Carmen，喺澳洲機場「重逢」一刻， Eric當時感覺恍如世界停頓：「我望住佢講唔到嘢，但我覺得我要照顧佢一世，呢個諗法我擺咗喺心裏面。」

不過Carmen當下心情十五十六：「我有計劃過講分手，我驚會負累佢，佢唔需要陪一個坐住輪椅嘅人，可能咩都做唔到。」 但係Eric並非空口講白話，由當年直到而家，佢對Carmen都無微不至，唔止冇視照顧Carmen為負累，仲話同Carmen結伴反而擴展咗自己嘅眼界同可能性，而Carmen嘅堅強亦成為自己成長嘅動力：「佢係我嘅摩打，有咩問題都兩個人一齊解決。」

Eric更向住鏡頭發表愛的宣言：「我對佢有一個承諾，我一定要長命過佢，因為我唔要佢承受我離世一刻嘅傷心。」 

而當年打動Carmen決定同Eric走下去嘅，亦因為Eric嘅無限積極同細心：「當年我返番香港後好擔心呢度嘅生活得唔得，Eric因為咁通街見到有輪椅人士，都會走去問人哋點樣生活。」最終二人決定結婚，但依然不無阻滯，當中最強烈嘅反對聲音仲係來自Carmen父母。

經過二十年嘅身體力行，Eric早連Carmen父母都成功打動，佢喺節目中哽咽，話早前獲外父送贈戒指作「認證」：「佢話一直都冇正式好認同我哋嘅婚姻，但呢十幾年睇到我哋嘅相處，佢都好感動好認同，佢直情同我道歉，話當初對我唔夠信心。」 

而今晚現身嘅另一位Carmen，係一位72歲嘅婆婆，同時亦係香港著名嘅年長芭蕾舞蹈員。喺近花甲之齡喪夫嘅Carmen，生活一度失去焦點同依靠，仲因而患上抑鬱，幸好62歲時因為學跳芭蕾舞重拾夢想，10年內取得 8 級資格，後再獲得專業2級資格，仲曾任劉德華MV女主角。

節目中Carmen除咗分享長者初學芭蕾舞必須面對嘅困難，仲會暢談點樣走出喪夫陰霾，內容相當感人、勵志同正面。主持 連詩雅 除咗會跟「芭蕾舞婆婆」即席學習芭蕾舞基本功，仲會大方分享對於「喪偶」嘅睇法：「我哋(同男友) 冇傾過呢樣嘢，但其實我自己有諗過，我會希望係我走先，因為我係一個情感上幾依賴另一半嘅人，所以我覺得我會成日都好掛住另一半，容易跌入寂寞嘅情感。」

《因為愛情》 星期一至五晚 22:30 J2