視帝10強競爭激烈丨陳山聰陳展鵬盼同奪獎皆大歡喜 陳豪睇好林敏驄封帝

TVB年度壓軸盛事《萬千星輝頒獎典禮2022》將於周日（8日）隆重舉行，每年焦點落喺視帝視后之爭，能夠躋身10強嘅演員絕對實力非凡，尤其視帝10強更係競爭激烈，成為大眾熱話，日前一眾型男前往影樓拍攝頒獎典禮場刊。

陳山聰、陳展鵬、林敏驄、馬國明同周嘉洛同時入圍「最佳男主角」及「最受歡迎電視男角色」兩項提名；陳豪、郭晉安及丁子朗角逐視帝、入圍男角色嘅張振朗、袁偉豪、朱敏瀚、何廣沛等齊齊影靚相。

林敏驄、陳展鵬同陳山聰成為今年視帝大熱，陳山聰同陳展鵬就分享理想得獎名單，希望一齊奪獎特別有意義，務求皆大歡喜，陳山聰盼陳展鵬憑《超能使者》再奪視帝，自己則憑《超能使者》拎「最受歡迎電視男角色」，陳展鵬望齊齊拎「雙視帝」，錦上添花！而張振朗撐陳山聰嘅毅力係值得封帝，何廣沛則敬佩陳展鵬喺《超能使者》嘅演出。

林敏驄喺《下流上車族》演車志明大受歡迎，贏盡觀眾口碑，被封為「民選視帝」，連陳豪都睇好車總封帝，陳豪讚林敏驄演繹方法及整套劇嘅感覺都好好：「我嗰票畀咗佢，我希望佢爭氣。」林敏驄好多謝網民支持，感受網民愛戴「車總」。

馬國明於2019年憑《白色強人》稱帝，今次再憑《白色強人2》問鼎視帝，馬國明自爆從來冇投票，笑言有幫未婚妻湯洛雯拉票；郭晉安更珍惜視頒獎禮為派對，每次到公佈得獎嗰刻先會覺得緊張，而周嘉洛及丁子朗首度入圍爭視帝，丁子朗覺得入圍10強已經好神奇，周嘉洛同朱敏瀚希望將運氣放喺《痞子殿下》拍檔獎。