周秀娜、袁澧林、林明禎、凌文龍等，呢日出席亞洲電影大獎記者會，入圍名單出爐，梁朝偉及林嘉欣均獲提名，林嘉欣雖然未能現身活動，佢透過語音感謝《美國女孩》台前幕後嘅努力。

梁朝偉同許冠文演嘅電影《風再起時》，分別獲提名最佳男主角、最佳男配角，偉仔得知好消息後，亦有分享感受，佢好多謝大家一直以來嘅支持同鼓勵，偉仔作為一個香港演員能夠同亞洲各地演員並列，感到相當榮幸；許冠文亦為此感到興奮，指今時今日拍電影好艱難，好開心參與呢套電影，為年青電影工作者同香港電影出一份力。

林明禎為咗隆重其事呢次活動，特別苦練廣東話自我介紹及宣讀入圍名單，為免失禮被嘲笑，佢自創Rap歌形式學廣東話，足足練咗兩日，講起同場女神們，林明禎原來有follow「文青女神」袁澧林，佢自言冇文青感覺，所以佢特別喜歡喺人哋身上搵呢種文青感覺，袁澧林亦有留意林明禎喺《飯氣攻心》嘅演出，笑指女仔都被明禎圈粉，二人本來係「網友」。

夏日熱辣辣，連天文台今年都加設極端酷熱天氣提示，而唔少女士都紛紛以清涼打扮外出，好似呢日 林明禎就以露背小背心加一條短裙仔現身活動，唔知在場男士見到會唔會覺得熱上加熱呢？

為飲品店現身嘅明禎啱啱度過33歲生日，慶祝活動未停過，不過呢日依然Fit到爆，呢日佢仲話今年收到最愛嘅BLACKPINK成員Lisa親筆簽名作為禮物，呢日佢講起都感覺到佢非常開心呀。

明禎大小活動同唔同代言都成日現身，所以呢日佢就話連瞓覺都唔夠，所以都唔使話旨意有拖拍喇。雖然近年佢專注唔同電影同廣告工作，不過以歌手身份出道嘅佢，就話希望可以三棲發展，仲話會安排返台北錄音造新歌呀。

年初已經租屋嘅明禎，又話雖然有安樂窩，不過就始終嫌地方唔夠大，所以會繼續努力工作，希望可以早日買到背山面海嘅大屋咁話呀。