萬千星輝頒獎典禮｜各大獎項塵埃落定 山聰美儀首封帝后 嘉洛三太成最愛角色 (重新上載)

TVB年度盛事《萬千星輝頒獎典禮2022》8號晚圓滿結束，16個專業獎項加上3個馬來西亞獎項、專業精神獎同萬千光輝演藝大獎分別頒發，競爭最激烈嘅最佳男、女主角，分別由《金宵大廈2》嘅 陳山聰 同《下流上車族》嘅 江美儀 獲得，而最受歡電視男、女角色，則成為《痞子殿下》嘅 周嘉洛 仲有《愛．回家之開心速遞》嘅 樊亦敏 囊中物。

最佳劇集無懸念之下由題材貼地嘅《下流上車族》獲得，加上最佳男配角得主 鄧智堅 同飛躍進步女藝員 郭柏姸 同美儀姐嘅大獎共獲4獎，成為年度大贏家。雖然「車總」 林敏驄 未能得獎，不過佢上台領取最佳劇集獎時依舊幽默風趣。

陳山聰 由呂良偉同郭可盈手上接過視帝獎座，回想過去高山低谷就令佢非常感觸，喺台上熱淚盈眶。至於有豐富經驗嘅「車太」江美儀榮登視后寶座，繼十年前最佳女配角之後再下一城，佢更先後幾次落淚。

由拍攝到後期宣傳都極富心思嘅《痞子殿下》，除咗周嘉洛得到最受歡迎電視男角色之外，同時亦同幾位拍檔 陳瀅 JW王灝兒 朱敏瀚 仲有 張頴康  獲得最受歡迎電視拍檔獎，相信對佢哋拍新一輯會係一劑強心針呀。

嘉洛亦都係最年輕嘅男角色得主，佢亦許下承諾指自己會繼續努力。而三太繼續風趣發表感言，當然唔少得向「威哥」大龍生致謝啦。

至於三個由大馬當地觀眾投票選出嘅大獎，馬來西亞視帝、視后分別由《超能使者》 陳展鵬、《美麗戰場》劉佩玥奪得，而最喜愛劇集《超能使者》亦成為當地觀眾心水。

每一部劇集都有唔少演員付出努力，先至成為完整作品，好似鄧智堅就非常驚訝自己獲獎，更加指希望《下流》原班人馬繼續再次合作呀。至於以「反骨琪」出色演出令人見人憎嘅蔣家旻，順理成章得到最佳女配角，由馬子妮到今日反骨琪，Angel嘅進步可以話有目共睹呀。事前非常緊張嘅佢仲話要好好放鬆食嘢瞓一覺呀。

有長足進步嘅發展，自然會有收穫，飛躍進步男藝員就由 吳偉豪 獲得，仲如參加《中年好聲音》嘅爸爸 吳大強 所願，可以親眼見證寶貝仔得獎。首次提名嘅「芊芊」郭柏姸因為多產又突出，今年得獎可以話眾望所歸。

最佳男、女主持獎方面，女主持由《無窮之路II-無價之保》嘅 陳貝兒 冧莊，而男主持則首次由新聞部嘅 方東昇 獲得，加上憑佢同團隊嘅細心貼地加上言之有物，《尋人記II》同時得最佳資訊及專題節目獎。

最受歡迎電視歌曲係JW喺《白色強人II》演唱嘅《Wish》，每周日為大家帶嚟無數歡笑嘅《開心無敵獎門人》帶走最佳綜藝節目殊榮；而最佳年度及特備節目則係去年舉行嘅《萬千星輝賀台慶》。

幕後人員一樣係必不可少嘅電視製作核心，今年度嘅專業精神獎，就由任職多年、為唔少藝人形象花盡心思嘅形象總監陳惠英獲得嘉許，更由多位曾受佢改造大變身嘅歷屆港姐成員宣佈結果。

至於唔少藝員同事每有機會上台都必定會多謝嘅「珍姐」曾勵珍，多年來都電視行業瞭如指掌，台前幕後各工種都一樣了解嘅佢，就成為萬千光輝演藝大獎嘅表揚之選喇。