《萬千星輝頒獎典禮2022》喺一遍熱鬧嘅氣氛下圓滿結束，各大獎項塵埃落定，大熱劇《下流上車族》除咗摘下「最佳劇集」外，江美儀同鄧智堅亦憑呢套劇贏得「最佳女主角」同「最佳男配角」，而喺呢套劇飾演林敏驄大女車芊芊嘅郭柏姸，亦都贏得「飛躍進步女藝員」。

頒獎禮後，一眾《下流》嘅演員接受訪問，首次封視后嘅江美儀就話要多謝阿驄負傷嚟支持，而阿驄就話唔可以錯過呢個時刻呀。講到套劇有咁好成績，嚟緊會唔會有續集？監製關文深就話要睇驄哥同美儀有冇時間嚟拍續集。努力十年由最佳女配榮升成視后，呢晚美儀姐嘅父母都有嚟現場見證愛女得獎時刻，佢哋接受訪問嗰陣，江媽媽仲叫美儀姐畀個獎佢拎下，非常搞笑。

一直被指係視帝大熱嘅陳山聰，憑《金宵大廈2》首封視帝，23年嘅演藝生涯入面經歷過大大小小嘅高山低谷，難怪山聰嘅心情到做訪問時都未平伏到，仲話聽到頒獎嘉賓呂良偉講個得獎者係聰字尾嗰陣，自己以為係林敏驄贏得，點知聽到對方宣讀自己個名嗰陣，真係成個腦一遍空白呀，山聰哽咽咁多謝一直以嚟幫過佢嘅朋友、太太同埋囝囝。問到佢之後會唔會再努力啲？山聰就話佢頒獎禮翌日清晨6點就要開工，笑言自己係要比努力更努力呀。

而「馬來西亞最喜愛TVB男主角」就由陳展鵬以《超能使者》奪得，佢除咗感激大馬fans嘅支持外，當然要多謝特登嚟現場撐自己嘅太太單文柔，單文柔話見到老公上台攞獎嗰下，心情緊張到爆呀。

至於「馬來西亞最喜愛TVB女主角」就由 Moon 劉佩玥憑《美麗戰場》奪得，出名係喊包嘅Moon，呢次首封大馬視后嘅佢竟然冇喊，連監製葉念琛都話相當神奇，事後Moon就解釋因為佢見到陳瀅同陳曉華當時已經喊到淚流滿面，而發緊呆嘅佢係因為陳瀅叫佢先至如夢初醒。

新生代演員周嘉洛，呢晚唔只憑《痞子殿下》紀威一角摘下「最受歡迎電視男角色」，佢同陳瀅、JW王灝兒、朱敏瀚同張頴康，亦都憑呢套劇贏得「最受歡迎電視拍檔」，嘉洛就話自己都覺得好驚喜，好多謝所有支持同錫佢嘅朋友，而陳瀅就話佢哋大家都好期待《痞子2》嘅開拍呀。

「最受歡迎電視女角色」就由三太 樊亦敏奪得，佢嘅一眾《愛・回家之開心速遞》家人都紛紛送上祝賀，劉丹仲笑言自己喺台下嗌到聲沙呀。樊亦敏就話如果冇呢班家人，都造就唔到三太呢個角色，所以個獎係屬於大家嘅。

而全晚嘅感動位，就係喺TVB服務咗多年嘅曾勵珍 珍姐，獲頒「萬千光輝演藝大獎」，珍姐上台領獎一刻，更加係成個錄影廠嘅人都全體起立致敬。珍姐事後接受訪問，就表示有啲說話想同曾志偉同埋主席講，就係佢哋好用心咁度咗一個好驚嚇嘅驚喜畀佢，珍姐又謙稱自己喺TVB工作咗幾十年，本來只係好平凡嘅人生，就喺呢晚突然畀咗一點高光時刻畀佢。

呢晚嘅頒獎嘉賓陣容媲美電影頒獎禮，當中有鄭則仕、任達華、張艾嘉、苗僑偉、黃日華、余安安、葉童、吳啟華、張兆輝、郭可盈、呂良偉、湯寶如、劉小慧等。佢哋大家都話相隔咁耐重返TVB，加上可以見到一眾老朋友相當難得呀。能夠搵到呢班咁重份量嘅嘉賓，最大功勞就一定係曾志偉，因為大部份嘉賓都係佢親自打電話去邀請嘅，志偉話見到大家嘅驚喜程度，一切都係值得嘅。對於《開心無敵獎門人》奪得「最佳綜藝節目」，志偉就話係大家嘅功勞，不過因為要兼顧總經理嘅工作，所以《獎門人》喺完成農曆年嘅錄影之後，會稍作暫停喇！

而我哋嘅主播周奕瑋呢晚獨挑大樑擔任大會司儀，全晚表現淡定，令唔少網呢激讚，事後Javis接受訪問嗰陣都難掩緊張心情，佢感激幕後同事幫咗佢好多，而最令佢感動嘅，就係自己親手寫嘅頭tag，可以喺呢個咁大型嘅頒發禮上一字不漏咁講晒出嚟呀！

頒獎禮過後，TVB門外聚集咗唔少fans嚟為偶像慶祝，除咗鮮花、燈牌、香檳外，有啲fans仲準備埋自製嘅獎座畀佢哋嘅偶像，非常熱鬧呀。

TVB新劇《隱門》噚晚（5號）呢集劇情主要圍繞楊忻曉Madam Yeung（湯洛雯飾）著手調查「衰老公」阿Mike死因，其間揭出阿Mike臨死前將買畀心月（黃智雯飾）嘅人壽保險，由 1,500萬臨時加碼至3,000萬；由於事情太巧合，令Madam Yeung矛頭直指心月及葉嘯天（吳岱融飾）。

可瑩與Mandy戲內戲外均感情要好。楊可瑩憑一雙眼睛清楚表達出失去父親嘅傷痛，眼淚流得自然。

噚晚亮點就係是飾演黃智雯女兒晴晴嘅楊可瑩，雖然被氧氣罩遮住大半塊臉，但當得悉爸爸離世後，仍可憑一雙眼睛清楚表達出失去父親嘅傷痛，眼淚流得自然。黃智雯受訪時大讚 「阿女」啲眼淚話嚟就嚟，事前 「阿女」唔需要醞釀，小朋友嘅情感永遠就係最單純、最真摯！

黃智雯正式落水前仲要被劇組額外「淋水」加工。黃智雯凍到「慘叫連連」，要淋濕完個身、再噴濕晒臉。兩位演員落水前都有briefing，安全至上。

阿Mike浸死真相成本周劇情關鍵，據知拍攝呢場重頭戲當日氣溫只有12至13度左右，身穿短衫短褲嘅「衰老公」黃子恆為配合劇情，須不斷上完水再落水，絕對係耐力及體力考驗。黃子恆全程衣衫盡濕兼凍到流鼻水，一度要脫去上衣擠出水份。

一落到水，黃子恆同Mandy即投入工作mode。

佢身上面嘅水，係多到可以扭到大量出嚟。昨晚播出阿Mike同葉嘯天喺遊艇上嘅搏鬥場面，不過呢啲都只係Madam Yeung嘅猜測。

黃智雯真係同黃子恆「有難同當」，正式落水前仲要被劇組額外「淋水」加工，凍到黃智雯「慘叫連連」，最終黃智雯專注地完成拍攝工作，拍完表現雀躍，不單止對住鏡頭大力揮舞雙手為自己打氣，黃智雯披住毛巾兼大叫：「啲海水好鹹」。對於Mandy素顏落水， 網民留言大讚佢係「天然美女」。 對於劇集播出後被指演出似「師奶」多過似Madam嘅湯洛雯（靚湯），在社交網以正面態度回應負評，並上載「嘟嘴」照：「虛心接受批評，才能進步……謝謝所有有留意我演出的觀眾，好的、不好的，都袋落袋，這湯會加油變成更好的湯！」湯洛雯更不忘以「師奶仔」自嘲，相當可愛！

劇集播出後湯洛雯被指演出似「師奶」多過似Madam。
《隱門》逢周一至五晚八點半翡翠台播映