《萬千星輝頒獎典禮2022》喺一遍熱鬧嘅氣氛下圓滿結束，各大獎項塵埃落定，大熱劇《下流上車族》除咗摘下「最佳劇集」外，江美儀同鄧智堅亦憑呢套劇贏得「最佳女主角」同「最佳男配角」，而喺呢套劇飾演林敏驄大女車芊芊嘅郭柏姸，亦都贏得「飛躍進步女藝員」。

頒獎禮後，一眾《下流》嘅演員接受訪問，首次封視后嘅江美儀就話要多謝阿驄負傷嚟支持，而阿驄就話唔可以錯過呢個時刻呀。講到套劇有咁好成績，嚟緊會唔會有續集？監製關文深就話要睇驄哥同美儀有冇時間嚟拍續集。努力十年由最佳女配榮升成視后，呢晚美儀姐嘅父母都有嚟現場見證愛女得獎時刻，佢哋接受訪問嗰陣，江媽媽仲叫美儀姐畀個獎佢拎下，非常搞笑。

一直被指係視帝大熱嘅陳山聰，憑《金宵大廈2》首封視帝，23年嘅演藝生涯入面經歷過大大小小嘅高山低谷，難怪山聰嘅心情到做訪問時都未平伏到，仲話聽到頒獎嘉賓呂良偉講個得獎者係聰字尾嗰陣，自己以為係林敏驄贏得，點知聽到對方宣讀自己個名嗰陣，真係成個腦一遍空白呀，山聰哽咽咁多謝一直以嚟幫過佢嘅朋友、太太同埋囝囝。問到佢之後會唔會再努力啲？山聰就話佢頒獎禮翌日清晨6點就要開工，笑言自己係要比努力更努力呀。

而「馬來西亞最喜愛TVB男主角」就由陳展鵬以《超能使者》奪得，佢除咗感激大馬fans嘅支持外，當然要多謝特登嚟現場撐自己嘅太太單文柔，單文柔話見到老公上台攞獎嗰下，心情緊張到爆呀。

至於「馬來西亞最喜愛TVB女主角」就由 Moon 劉佩玥憑《美麗戰場》奪得，出名係喊包嘅Moon，呢次首封大馬視后嘅佢竟然冇喊，連監製葉念琛都話相當神奇，事後Moon就解釋因為佢見到陳瀅同陳曉華當時已經喊到淚流滿面，而發緊呆嘅佢係因為陳瀅叫佢先至如夢初醒。

新生代演員周嘉洛，呢晚唔只憑《痞子殿下》紀威一角摘下「最受歡迎電視男角色」，佢同陳瀅、JW王灝兒、朱敏瀚同張頴康，亦都憑呢套劇贏得「最受歡迎電視拍檔」，嘉洛就話自己都覺得好驚喜，好多謝所有支持同錫佢嘅朋友，而陳瀅就話佢哋大家都好期待《痞子2》嘅開拍呀。

「最受歡迎電視女角色」就由三太 樊亦敏奪得，佢嘅一眾《愛・回家之開心速遞》家人都紛紛送上祝賀，劉丹仲笑言自己喺台下嗌到聲沙呀。樊亦敏就話如果冇呢班家人，都造就唔到三太呢個角色，所以個獎係屬於大家嘅。

而全晚嘅感動位，就係喺TVB服務咗多年嘅曾勵珍 珍姐，獲頒「萬千光輝演藝大獎」，珍姐上台領獎一刻，更加係成個錄影廠嘅人都全體起立致敬。珍姐事後接受訪問，就表示有啲說話想同曾志偉同埋主席講，就係佢哋好用心咁度咗一個好驚嚇嘅驚喜畀佢，珍姐又謙稱自己喺TVB工作咗幾十年，本來只係好平凡嘅人生，就喺呢晚突然畀咗一點高光時刻畀佢。

呢晚嘅頒獎嘉賓陣容媲美電影頒獎禮，當中有鄭則仕、任達華、張艾嘉、苗僑偉、黃日華、余安安、葉童、吳啟華、張兆輝、郭可盈、呂良偉、湯寶如、劉小慧等。佢哋大家都話相隔咁耐重返TVB，加上可以見到一眾老朋友相當難得呀。能夠搵到呢班咁重份量嘅嘉賓，最大功勞就一定係曾志偉，因為大部份嘉賓都係佢親自打電話去邀請嘅，志偉話見到大家嘅驚喜程度，一切都係值得嘅。對於《開心無敵獎門人》奪得「最佳綜藝節目」，志偉就話係大家嘅功勞，不過因為要兼顧總經理嘅工作，所以《獎門人》喺完成農曆年嘅錄影之後，會稍作暫停喇！

而我哋嘅主播周奕瑋呢晚獨挑大樑擔任大會司儀，全晚表現淡定，令唔少網呢激讚，事後Javis接受訪問嗰陣都難掩緊張心情，佢感激幕後同事幫咗佢好多，而最令佢感動嘅，就係自己親手寫嘅頭tag，可以喺呢個咁大型嘅頒發禮上一字不漏咁講晒出嚟呀！

頒獎禮過後，TVB門外聚集咗唔少fans嚟為偶像慶祝，除咗鮮花、燈牌、香檳外，有啲fans仲準備埋自製嘅獎座畀佢哋嘅偶像，非常熱鬧呀。

由今晚起「鷲哥」呢個名已經out咗，要叫就要叫「天哥」！因為今晚開播嘅新劇《隱門》，吳岱融會喺入面飾演比鷲哥更狠更惡嘅賊王葉嘯天。
岱融哥今次演賊王葉嘯天。
之前喺《巨輪II》就已經為岱融哥打造出鷲哥呢個狠角，嚟到今次《隱門》，監製Amy姐王心慰笑言要為對方打造狠角天花板，所以度身訂造咗葉嘯天呢個十惡不赦嘅賊王角色畀岱融哥，Amy姐笑謂：「之前佢拍《巨輪 II》，我喺現場睇已經覺得佢表現超出我預期，然後我一直覺得佢有潛質再爆上去。」
個樣好兇狠。親生女都照打。
而據官方釋出嘅預告片，完全感受到天哥嘅「暴力美學」，唔理係劇中、由黃智雯飾演嘅親生女心月，定係一齊坐監嘅囚犯，只要一言不合天哥就會暴打對方，箍頸、撼頭埋牆、連環掌摑呢啲都係基本，其中一幕天哥喺服刑期間，發狂咬甩另一囚犯嘅耳仔，不過因為尺度問題，所以出街前就決定剪走。
據知呢幕太血腥所以剪走咗。離遠睇都係好可怕。
再次做狠角，岱融哥坦言有壓力：「成日要將個轉數Tune到好高，同埋真係打得比較多，所以有啲壓力，自己演繹呢個角色好多時係扯到行晒，好似睇咩都唔妥咁，係好玩嘅，但亦真係需要大量體力。」講到同之前「鷲哥」一角嘅分別，岱融哥話高天鷲係有錢嘅惡人，而葉嘯天就係冇錢嘅惡人：「因為冇錢佢發晒癲、不擇手段，仲要好喪。」岱融哥話劇中自己暴難忘嘅一場，係臨尾爭啲畀陳展鵬活埋嘅戲份，岱融哥話除咗係因為拍攝時好辛苦外，最重要係當日呢場戲佢嘅囝囝嚟咗現場，仲好認真咁幫佢影攝劇照，即刻令岱融哥覺得再辛苦都值得。
天哥成日都打人耳仔主意！呢個樣真係會令人心寒。
至於講到要應付劇中大量動作場面，岱融哥就話好在平日都有keep住鍛煉體能，又指監製 Amy姐好體恤，搵咗個替身畀佢，等佢有機會抖吓。

《隱門》逢星期一至五 20:30 翡翠台