/public/article/images/202301/9435802c-dc64-4572-b7ce-b56d76f6dc8f.jpg)
一連15集嘅《因為愛情》節目，今、明兩晚嘅愛情個案主角都同音樂相當有緣。今晚主角係先後殺入熱播綜藝節目《中年好聲音》100強同50強嘅離婚夫妻許兆銘(Samuel)同呂卓欣(Ada)，二人當時「同台」一度引起熱話。
《中年好聲音》播出時，Ada同Samuel關係疏離，但係齊齊亮相《因為愛情》，就有啲出人意表，Ada受訪時仲話同Samuel離婚後一度關係惡劣，愛笑嘅佢邊向著鏡頭扮鬼臉邊話：「曾經好憎佢架真係！」，至於Samuel則話：「憎還憎，但係冇尷尬過吖嘛。」
「離婚」後再相處仍可以咁從容，原來全靠音樂。佢哋由相識、 拍拖到結婚都同「音樂」有關，舊年因為參加《中年好聲音》意外重逢，當時同前夫鮮有交流嘅Ada仲激動哭成淚人，之後因為各種原因，佢哋重新嘗試交流，令已冰封嘅關係逐漸融化。
Ada同Samuel當年緣盡係因為第三者介入，Ada重提當日發現老公有外遇時不無傷感：「我記得我喊住搭巴士返屋企，好似個天冧咗落嚟咁樣。」仲話離婚對兩名女兒造成一定影響：「細女曾經問『我唔知點解人哋有爸爸，我冇爸爸。』小朋友都有懷疑自己係咪有嘢做得唔好而令父母分開。」
因「第三者」問題令太太心淡離去嘅Samuel，喺鏡頭前亦淚眼表達對前妻嘅愧疚：「我一定有做錯，當初其實冇諗過要離婚。我好多嘢做得唔夠好，始終後生時會睇自己多啲。當初咁愛一個人，同佢一齊係希望每一日都令佢開開心心，但最後我做唔到。」
如今難得同Ada「冰釋前嫌」，一對女兒亦喜歡黐實自己，Samuel自然費盡心思修補關係，除咗安排烘焙樂親子活動，又巧妙安排街頭 Busking同昔日愛妻兼歌唱拍檔Ada重拾回憶，令 Ada再度哭成淚人，仲大嘆回憶湧現。
要喺愛情節目中訪問一對感情曾經破裂嘅離婚夫婦，主持 連詩雅 覺得震驚又尷尬，不過後來Shiga唔止對佢哋大表欣賞，仲回想起自身經歷而淚崩：「我自己都係過來人，所以都代入咗兩個囡囡嘅心情。Samuel話佢兩個女係一家人相處開心嘅動力，呢個畫面對於我嚟講好難再可以有。我都好欣賞Samuel同Ada可以擺低佢哋嘅仇恨，為佢哋兩個女去踏前多一步，希望畀番個完整家庭生活佢哋。」
至於11號晚一集嘅主角係視障鋼琴家李軒同太太Umi，自細因患有視網膜色素病變退化，至今只剩大約一成視力嘅阿軒，當初同Umi到底點樣開展「感情線」？佢哋之間嘅相處同一般情侶或者夫妻又會有咩分別？令人意外嘅係，阿軒喺屋企唔止擔當照顧者角色，仲為咗陪太太攀石下海大小運動樣樣做齊，當中嘅熱誠同真摯令人相當動容。最後一周節目同大家感受更多不一樣嘅感人愛情個案。
《因為愛情》星期一至五晚 22:30 J2
