家燕姐美國登台老友紛撐場 年後飛大馬登台宣傳《黃金萬両》

薛家燕  早前去咗美國三個城市登台，近日已經返港嘅佢又已經繼續投入工作喇，家燕姐呢次分別去咗洛杉磯、紐約同三藩市表演，同當地嘅歌迷見面，又唱又跳之餘仲準備埋韓文歌表演呀。

咁難得飛到去美國，家燕姐唔少老友仲特別飛去美國捧場，其中好似 陳曼娜 就親身飛埋去洛杉磯，會合 林穎嫺 仲有早年已經移居當地嘅資深演員 梅蘭姐 齊齊捧場，去到三藩市又有夏蕙姨 出現，不過最開心就係「七公主」當中嘅二家姐 沈芝華 約埋大班親友飛去當地捧場加旅行喇。

家燕姐話雖然今次美國之行舟車勞頓，不過同咁多好朋友見面就咩都值得喇。雖然係開心，但係飛咗咁耐冇得見乖孫就令佢歸心似箭，仲掛住到要喺台上同大家開心Share孫仔嘅影片。

雖然新年得返個零星期就到，唔少行業都已經準備收爐，而新一年家燕姐就話世界各地開關之下，佢3月就會再出門去大馬拍新廣告，仲會為即將推出嘅新劇《黃金萬両》宣傳，仲話擔心飛完嘆太多美食會變肥呀。