馬天佑為員工派過萬蚊開工e利是 陳凱琳即為兩愛子率先拜年

農曆新年就嚟到，大家又要忙住換新鈔嚟封利是喇！不過以前每年要用成過百個利是封嚟封利是嘅Grace陳凱琳，就話今年終於可以環保啲改派E利是！因為佢同馬天佑Mayao最近一齊為一間銀行拍攝新年企業電子利是廣告，同大家介紹e利是的好處。

身為星級形象顧問公司老闆嘅Mayao，就話適逢佢公司創辦十周年，所以即使今年佢新年期間會外遊，都會喺吉日為員工們派發多封過萬蚊開工e利是，以答謝員工們嘅努力。聽到馬老闆出手咁闊綽，Grace就笑言想即刻成為對方公司嘅員工，又話要幫兩個囝囝同Mayao拜年𢭃封大利是呀！