呂方40周年演唱會記招宣傳 張學友拍片支持

呂方將喺3月舉行入行40周年演唱會，呢日舉行記招宣傳，好友倫永亮到場支持，多位圈中好友張學友、鄧梓峰、陳芷菁、胡定欣及阮兆祥等拍片以示支持，被問最想聽呂方邊首金曲，學友好想聽《聽不到的說話》，覺得呢首係當年最好聽嘅歌。

呂方坦言已揀歌單，歌曲均係觀眾耳熟能詳，不過佢暫時未考慮邀請嘉賓，呂方稱今次會安排愛女喺後台睇自己綵排，但無意帶2歲愛女上台獻唱。

1月19號係呂方59歲生日，主辦方送上生日蛋糕為佢提早慶祝，場面熱鬧，不過呂方指自己要忍口，因為自己好易變胖，目前要努力keep fit，呂方稱每年農曆新年都留喺屋企陪家人，盡量控制食量。近日歌手藝人相繼確診，呂方指較多時間留喺屋企，盡量避免中招，不過佢直言呢啲意外好難講，希望自己冇事。