呂方將喺3月舉行入行40周年演唱會，呢日舉行記招宣傳，好友倫永亮到場支持，多位圈中好友張學友、鄧梓峰、陳芷菁、胡定欣及阮兆祥等拍片以示支持，被問最想聽呂方邊首金曲，學友好想聽《聽不到的說話》，覺得呢首係當年最好聽嘅歌。

呂方坦言已揀歌單，歌曲均係觀眾耳熟能詳，不過佢暫時未考慮邀請嘉賓，呂方稱今次會安排愛女喺後台睇自己綵排，但無意帶2歲愛女上台獻唱。

1月19號係呂方59歲生日，主辦方送上生日蛋糕為佢提早慶祝，場面熱鬧，不過呂方指自己要忍口，因為自己好易變胖，目前要努力keep fit，呂方稱每年農曆新年都留喺屋企陪家人，盡量控制食量。近日歌手藝人相繼確診，呂方指較多時間留喺屋企，盡量避免中招，不過佢直言呢啲意外好難講，希望自己冇事。

最近張學友相隔8年再推出國語單曲《又十年》，之前佢已經講過首歌猶如佢人生嘅寫照，呢日佢拍片解說呢首歌，學友話：「歌詞中所寫的事會令我想起從前，比如以前會喝酒、會約朋友聚會，現在少了。以前看不開或解決不到的問題，現在都變得沒甚麼大不了。」

對於歌詞入面提到「那些轟轟烈烈讓人懷念已經跟我没有關聯」，學友亦相當有感觸，佢仲話轟轟烈烈係年青時，先會有嗰種不顧後果嘅任性，佢話：「如今回首過往會有種無法挽留的無力感，面對與自己已經無關的不捨時，還是會有點難過。」

雖然唱到眼泛淚光，但學友唔認為首歌曲係太沉重，只係提醒大家要珍惜時間，要抱住「好好咁過、好好地做」嘅心態，因為年青時總覺得時間過得好慢，唔會理解同時間競賽嘅道理，但當年紀漸長先知道時間係無情嘅，就好似歌詞入面所寫嘅「時間它殘忍起來毫無道理可言」咁，學友亦感慨咁話：「當時間過得越快，你的時間就越少，這是大家都要面對的事實，無限的時間、有限的生命。」

之前傳出過學友籌備緊演唱會嘅消息，呢日佢再鬆口話準備好就會公佈：「不要以為我做過很多次演唱會就可以駕輕就熟，不一樣的演唱會，自然就要面對不同的問題與挑戰。現在可以說的就是，未來半年內我準備開演唱會。」