開壇丨蘇民峰解構香港地運變化 親授風水睇完包你識計吉凶位

開壇丨蘇民峰解構香港地運變化 親授風水睇完包你識計吉凶位

J2節目 (82 台) 今晚 (13日) 有蘇民峰拍住4位J2ers倪嘉雯(Carmen)、陳若思(Amber)、黃嘉雯(Carmaney)同陳國麟(Doniven)主持嘅《開壇》。今晚播出係新一季《開壇》,蘇民峰師傅會喺節目開班教授風水命理。

蘇師傅在螢幕前開班授徒。

有報道指師傅私人教授收費,每課以10萬元計,仲要夾過生辰八字,有緣人先肯教,蘇師傅喺節目開始前介紹,指導觀眾睇風水︰「無論外巒頭、內巒頭;宅內外形勢;飛星都會教你,每堂都有嘢背,睇完包你識計八宅飛星、每年吉凶位置。」睇節目學風水,袋錢落你袋,至於4位J2ers今次一啲都唔輕鬆,因為每4集有一次小考,得分最高主持可以外出跟蘇師傅實習。

(左起)Carmaney 、Doniven 、Carmen同Amber認真上堂學術數。

Amber更係真人不露相,未做《開壇》節目前已係蘇師傅粉絲,拜讀過唔少蘇師傅嘅作品,佢接受訪問時話︰「未上堂之前,其實我自己都有上網睇人哋講風水,我係師父粉絲,差不多佢出嘅書我都有買。」每集會同其他主持喺螢幕前上堂,每人好認真寫筆記,佢透露暫時學咗基本家居佈局,更風水師上身︰「而家基本都仲係(行緊)八運,所以淨係睇東南同西北兩個方位都夠,門向東南或者西北就旺丁同旺財。」

Amber諗過將來加入風水行業,上課非常認真。

Amber同時已學曉找尋家居的五鬼(衰位),六煞(桃花位),天醫(財位)方位,自言有同師傅講過正式拜師︰「不過佢話而家咪教緊我哋囉,其實都有諗過學曉之後第時可以搵食。而家都係幫屋企同親人睇先啦。」

Amber話想拜蘇民峰為師學術數面相。

今次螢幕開課,似乎開正學霸Carmen一瓣,中學時期修讀理科,對破解謎題駕輕就熟,Carmen接受訪問時話︰「學霸唔敢當,新一季要考試,都鍾意呢種模式,喜歡邏輯推理,不嬲考試都冇壓力。中學時期對唔明嘅事會好想知點解,每事問所以同學都叫我『煩煩』,不過冇惡意嘅。」另外, Doniven回覆時話今次可以跟師傅學到八宅風水,希望學成之日,可以幫自己屋企睇風水,Doniven說︰「之前有學過八字算命,都有諗過第時業餘幫人哋算命。」

課程非常認真,每4集會有一次小考,蘇師傅好認真準備教材。

Amber同Carmen上堂時表演踴躍。

今晚第一堂會講解「陰陽」概念,世間萬物非陰即陽,好似山、水屬陰,空氣屬陽,師傅喺節目中提到口訣「陽氣遇空而竄,陰氣界水即止」,讀術數一定要識。談到香港「九曲來水」嘅絕靚風水格局,因為一件事,解困香港開埠之初,灣仔、尖沙嘴一帶嘅「割腳水」破傷運勢,到近年做同一件事,結果卻不一樣,令香港只可以搵快錢。想知道係咩事,會如此矛盾?留意今晚播出《開壇》。


蘇師傅解釋香港地運的變化。Carmen讀書時期是學霸,每事問有「煩煩」的外號。課程深入淺出講解。學睇風水羅庚是基本課程之一。Amber是蘇民峰粉絲,差不多有齊他的著作。
新一季開鑼|《開壇》逢星期五晚上 11點J2 (82台)播出

不正常愛情研究所丨Koba文頌男化療無效腫瘤變大 感覺開始活得好冇尊嚴

Koba文頌男舊年年尾喺社交平台公開有個惡性腫瘤喺自己嘅椎間近盤骨附近嘅位置,之後要接受第一階段治療。Koba喺3月27號分享病況,佢話做咗五次化療,治療無效,照咗磁力共振,發現個腫瘤仲變大咗少少。直認感覺好無奈嘅Koba指聽到醫生講「個治療冇乜效果、個腫瘤仲要大咗少少,最後一次化療都唔好做喇,準備做電療啦。」嘅時候,心情好似跌咗落深淵。佢真係好驚,感覺距離死亡又近咗一步,而且可能唔係死咁簡單,係會死得好痛苦,因為下肢 、盤骨附近嘅位置係越嚟越痛,痛到開始連嗎啡都冇辦法舒緩到,身體仲會不自覺抽搐,有啲身體部位已經變得麻木,排泄方面都開始出現好多問題(呢部分太羞恥都唔想講太多),我開始有種感覺係「我活得好冇尊嚴」,因為行動不便、痛,每日都係喺屋企對住四埲牆,幾乎零社交、零工作,每日都活得好似好無意義咁。

今晚(28 日)終極篇 7 位主持齊集。

Koba再指自己由細到大都遇到唔同難關同挑戰,就算每次嘅挑戰都越嚟越困難,佢都靠自己一一跨越過,但個天就好似好想佢死咁,唔肯放過佢,唔想畀佢輕鬆。佢又講到就算自己想放棄,但其實根本唔知可以點放棄。因為未死嘅話,佢都只能夠選擇堅持。依家每日都痛、非常痛,無一刻唔痛,每日度日如年,佢亦唔知幾時可以開始電療、幾時先可以舒緩到嘅痛楚,只係盼望可以快啲唔痛。Koba話真係覺得好攰、好攰、真係好攰。

Susuca 想起 Koba 的病況,忍不住喊起來。

Koba亦講到好多癌症病人即使表現得有幾堅強、幾樂觀都好,都會有佢以上類似嘅諗法。但會咁樣諗唔代表佢放棄,Koba話自己仍然好努力對抗呢個病,即使幾唔想食嘢,都逼自己食;即使幾痛都好,都逼自己要郁吓,唔好畀啲肌肉退化得咁勁。佢仍然好熱愛自己嘅拍攝、演出工作。好希望有一日可以康復、行動自如,可以繼續返呢啲工作。

Jojo 祝願 Koba 做到 1,200 集

Koba有份主持嘅《不正常愛情研究所》喺今晚(28號)播出第91集,7位主持濟濟一堂講出做主持嘅感受之餘,喺節目中終極互數對方。《聲夢傳奇2》出身嘅Kim係最後期加入節目嘅主持,佢誇口雖然半途出家,但一直「驚都未驚過」。此話一出即時惹嚟其餘6位主持反擊,有片有真相被翻「黑材料」,回帶片段中見到Kim第一次擔任主持一職時,唔單只講嘢口震震,雙手又顯出非常不安。喺避無可避之下Kim即刻認輸,兼轉風向話︰「係驚嘅,但當時好努力跟住Doniven個flow。」

Doniven、Gillian 以「有故事的人」身份加入成為主持。

呢集每位主持言行都去到好盡,Gillian收到嘅短訊仲露骨「你好靚,真係好靚,靚就贏咗。最記得係Doniven話要食你嘅臭鮑魚……」。原來係出自Kim嘅手筆,佢解釋「臭鮑魚」係指Gillian下廚煮畀大家食嘅鮑魚有臭味。

在「棉花糖女孩」一集製作組為各主持 P 了一輯肥仔肥妹相。

除咗「爆料」,呢集亦有令人感動嘅情景,Susuca同Jojo分別為患病嘅Koba送上祝福,Susuca講到對Koba嘅印象時話「初初識你嗰個月開廠就傾偈,知你又拍拖又分手。有日見到你腰痛不停問你咩事,後來你公布患病消息,咁細個就要經歷咁多嘢,加油快啲好返,做你想做嘅事。」接住佢喺節目中哭成淚人,調轉番要Koba安慰。

Karen 及 Jojo 被翻出中學時期的黑材料。

《不正常愛情研究所》逢周四晚10點J2 (82台)播映

 相關推薦

熱門搜尋