一眾《愛·回家之開心速遞》演員齊集電視城，同觀眾拜早年，眾人玩遊戲之餘，劇組更同1月13號生日嘅劉丹慶生，丹爺、豹哥單立文、滕麗名及呂慧儀受訪時指拍《愛‧回家》今年踏入第7年，豹哥笑言一開始入廠拍攝，冇諗過要拍咁耐，丹爺聞言即大笑。

「大小姐」林淑敏分享龍家習俗，開心指每年都要逗「大龍生」羅樂林嘅利是，亦係好意頭嘅象徵，利是封相當有心思係「大龍生」肖像封面。

「三太」樊亦敏喺台慶頒獎禮首奪「最受歡迎電視女角色」，「朱凌凌」吳偉豪則獲「飛躍進步男藝員」，呢日佢哋帶埋喺台慶頒獎禮獲得嘅獎座，與劇組一齊分享喜悅，劇組安排切燒豬，「三太」樊亦敏稱工忙到無暇慶祝，呢日佢仲要開三組戲，吳偉豪更獲焦浩軒吻賀。

吳偉豪 同參加《中年好聲音》而頻頻亮相嘅Daddy 吳大強 近日應邀為 TVB娛樂新聞台 拍攝父親節專輯，呢日Ricco仲帶埋Bill哥哥直闖錄影廠嘅主播枱，化身埋主播扮訪問Daddy，非常有趣。

父子齊齊忙全演藝事業，Ricco同Bill哥哥都話係得力於屋企嘅好太太同好媽咪照顧先成事，Bill哥哥仲話入行後先明白Ricco嘅辛苦咋。多咗機會一齊合作開工，仲有廣告接嘅佢哋，雖然難得有近距離接觸有啲尷尬，不過就話機會非常難得呀。

Bill哥又提到Ricco開工嘅情況過往根本無從了解，而家就不時有機會碰面仲見到完全唔同嘅乖仔認真一面呀。

對《好聲音》嘅其他成員先後錄製唔同劇集歌曲，Bill哥哥就話自己都希望有機會參與，仲話越來越對自己廣東歌嘅表現有信心，而Ricco就話希望可以同Daddy或者全家一齊出動拍旅遊節目喇。