StarTalk丨王菀之讚張敬軒首拍賀歲片演技好 呻對打戲全身瘀晒

張敬軒同王菀之(Ivana)首度合作拍賀歲片《超神經械劫案下》，日前作客TVB娛樂新聞台節目《StarTalk》，與主持許文軒暢談拍攝點滴，二人老友鬼鬼，不忘互窒對方。

今次軒公再登大銀幕，當然同好友王菀之有關，坦言因王菀之先接拍呢套戲，軒公喺戲裡動作打戲連場，平日斯文嘅軒公表現超乎王菀之想像，王菀之指軒公本身有武功底子好揪得，笑言睇漏咗呢一點，軒公細細聲講練過童子功，王菀之話打完嗰場，發現自己全身瘀晒。

軒公笑稱得知跟王菀之拍對打戲，當刻腦海幻想係甄子丹與楊紫瓊嘅打鬥場面，不過而家出嚟變咗「牛池灣楊紫瓊」VS「彩虹甄子丹」，加埋攝影機位配合，同CG特效，拍出嚟都OK，而王菀之亦有讚軒公演得好，真係似一個阿頭帶住啲下屬嘅感覺。想知更多就要收睇全片！