有種好男人丨楊卓娜揭渣男暗撻女下屬淚崩徐榮拋愛情金句：唔放手咪仲嘥時間

「渣男」賴Sir（歐瑞偉飾）一直利用保安公司行政部經理娜姐（楊卓娜飾）對其傾慕之情攞著數，至噚晚（13日）嗰集《有種好男人》，賴Sir終被揭發搭上娜姐下屬Macy（張詩欣飾），「個心穿咗個窿」嘅娜姐瞬間崩潰，坐喺馬路上放聲痛哭，我見猶憐。

賴Sir經常利用娜姐對佢嘅愛慕之情攞著數。點知賴Sir原來同公司同事Macy玩地下情。

娜姐撞破二人密會即匿喺門外飲泣。

之後娜姐仲行行吓喺街度扭親隻腳，雪上加霜。

此時夏中秋（徐榮飾）化身「暖男」給予安慰，不甘輸畀「後生女」，娜姐向對方大吐苦水：「我為佢付出咗咁多，但到頭來乜都冇，真係好唔甘心。」
夏中秋隨即大拋警世金句「唔放手咪仲嘥時間」、「腦明白係一回事，個心接受係另一回事」、「最緊要做咗啱嘅決定，其他嘅嘢交畀時間啦」，落力哄女方開心，更為對方出頭寸爆賴Sir，最後成功將娜姐「私有化」。

正當娜姐坐喺馬路上爆喊之際，中秋現身仲聽對方呻。中秋大拋警世金句。

劇中情路崎嶇，但現實中楊卓娜卻係一名「幸福繼母」，佢與「廣告燈箱大王」楊志翹相愛十幾年，人前人後依舊恩愛甜蜜。楊卓娜受訪時稱未遇過「渣男」，但坦言自己過去跟「娜姐」一樣執著，以前為堅持而堅持，所以佢好認同「唔放手咪仲嘥時間」，講到拍攝淚崩街頭呢幕，楊卓娜認為最困難係著高踭鞋行斜路，亦未試過喺條街放聲大哭，感到好尷尬，但咁樣做任性得嚟又好過癮，令情緒宣洩。

之後中秋仲替娜姐出頭。暗寸賴Sir漁翁撒網、一腳踏幾船，更利用別人好感攞著數。

另邊廂，田中直男（黎學勤Jeffery飾）自我介紹為大企業後代，惟飛雲（陳自瑤Yoyo飾）先後撞破田中換上工作服維修大廈及當外賣車手，令田中身份相當有可疑，當中最搞笑一幕，係廣東話得半桶水嘅田中把「A貨」理解為「Ichiban（指一流）」，其間鬧出唔少笑料。

田中自稱係日本企業後代。點知轉個頭被飛雲發現佢換上工作服進行維修。

提到首次跟Jeffery合作，Yoyo坦言與私下唔相熟嘅演員扮情侶，拍攝初頭需要慢慢摸索，並大爆對方一拍親熱戲即怕醜，Jeffery有面紅尷尬，多數係Yoyo主動撩佢傾偈同講笑，去舒緩對方情緒令Jeffery放鬆啲，盡量熟絡啲就冇咁尷尬；劇中飛雲疑似遇上靚仔富二代，問現實中靚仔同有米會咩抉擇？Yoyo打趣道：「當然係靚仔又有米啦，但其實都幾難，因為人永遠冇完美嘅，不過我覺得最緊要係專一。」

有日飛雲叫外賣，個外賣車手又係田中！飛雲大讚對方啲衫同手錶好靚。被茄汁濺污衣衫嘅田中心痛大嗌：「呢件A貨我好鍾意㗎！」場面爆笑。