賀年特別版《獎門人新春感謝祭》今晚播出,除咗有「獎門人」曾志偉,同五位「獎老」之外,仲有「元老級獎老」林曉峰 回歸擔任主持,而嘉賓就分別有「兔兔收得隊」嘅 何超蓮 陳瀅 王灝兒 加上《聲夢傳奇2》亞軍 黃洛妍 畢業生 侯雋熙 文佐匡 陳昊廷 ,以及「美女猛獸隊」嘅余思霆 陳嘉慧 彭慧中同 陳星妤(前名陳聖瑜)。
除咗玩遊戲之外,佢哋又為觀眾揀筍貨,希望觀眾都可以以超筍「獎門人新春感謝價」辦年貨過年。
今集嘉賓美女如雲,好似已故賭王千金 何超蓮 首度現身《獎門人》, 自薦上陣嘅佢全程傾盡全力,毫不介意食「辣壽桃包」兼濕身,喺「口噏噏」環節仲因誤會JW講粗口,搞到一頭霧水 「天然呆」,令全場爆笑。
有「鑽石級女神」大駕光臨,現場男士唔少都變成「怕醜綿羊仔」,好似「坐波波」環節時,負責夾實氣球嘅Sean同Timothy埋位已經面青青,超蓮仲忍唔住話:「做咩啫?!我依家好 恐怖咩?」話口未完獎門人就無預警衝前坐爆Sean大腿上嘅汽球,為超蓮作親身示範。之後超蓮來回跑跑跳跳,搞到索晒氣兼大嗌「腳軟」,獎門亦再出手「怒坐」Timothy向超蓮傳授秘技,場面搞笑。
其後上陣嘅JW就施展「魚躍龍門」雙腳離地彈跳坐爆波,衝擊力勁到Sean同Duncan都面容扭曲好似受刑咁,前者見JW飛撲一刻仲恐慌到大聲慘叫!身材嬌小嘅JW又被獎老們連環攻擊,先係「排排坐」期間被阿Lo暗寸:「有個別嘉賓企喺度,我又唔覺企喺度。」 之後玩「開口中」時,JW向獎門人報寸被程浩駿從後偷襲掟Cream,點知獲准還擊嘅佢又不敵「高人」程浩駿嘲諷:「你夠唔夠高架?」激到JW怒「抆」Cream報仇。呢集仲有人「冧莊」連續開口中,搞到兩次受罰面目全非變成「雪人」,非常黑仔呀。
《獎門人新春感謝祭》今晚20:30 翡翠台