中年好聲音丨彭健新首任評審直言淘汰好殘忍 曹敏寶感動獲好友朱智賢支持

中年好聲音丨彭健新首任評審直言淘汰好殘忍 曹敏寶感動獲好友朱智賢支持

歌唱真人騷《中年好聲音》呢日播出第7集係第三部曲《團戰!影視金曲生死鬥!》,26位選手分成六組進行比賽,經過一輪精彩感人又激烈嘅團戰,由丁文俊擔任隊長嘅《燕尾蝶》,在有四位五燈選手加持嘅情況下,唱出全晚最高分86分,周吉佩更因而激動爆喊,全員唔使淘汰。

事前周吉佩確診,難夾時間排練,佢一直好擔心影響全隊分數,知道隊伍獲高分數即難忍淚水,曹敏寶好感動獲好友朱智賢支持,全靠對方推動參賽,當年佢哋17歲參加過「Cookies新鮮出爐日」比賽認識,朱智賢知道曹敏寶非常熱愛唱歌,唔想好友錯過呢個機會。

《領悟》組表現亦唔錯,拎到第二高分,同樣全員晉級,李思林感謝隊友互相扶持,梁愷庭大讚隊友唱得好好,佢哋都好驚喜獲得呢個分數,4位隊友覺得好開心。

呢集先後淘汰6名選手,由26強濃縮至20 強,被淘汰選手分別為《今宵多珍重》組馮志豪、應德榮,《年少無知》組劉智衛、柳冕、《心急人上》組「紅美人」 李泇霖,以及《女神》組陳早怡,26強止步,不過佢哋都異口同聲話好開心參賽,為人生留下不一樣嘅回憶,柳冕認為去到呢度先淘汰已經賺咗,感覺係光榮,柳冕同時因參賽後搵番好多小學同學,可以開小學同學聚會,劉智衛亦唔會放棄音樂夢,繼續堅持音樂創作,而馮志豪同陳早怡都認為呢個機會好難得,但係識到呢班朋友都值得。

本集嘉賓評審彭健新首任評判,坦言淘汰參加者好殘忍,而肥媽見證一眾參加者喺音樂路成長,肥媽好唔捨得柳冕,張佳添則不捨劉智衛:「佢唱歌爭咗少少,畀多兩、三年鑽研吓,佢係音樂感好強嘅人。」

李泇霖推出首支單曲 獲《中年好聲音》戰友力撐支持

《中聲1》參賽者李泇霖舉行發布會,宣布推出首支個人單曲,獲前輩文佩玲、莫鎮賢同《中聲1》戰友吳大強(Bill哥哥)、丁文俊同支嚳儀、魏嘉信同柳冕等人支持,眼見家人朋友支持,泇霖都覺得非常開心,好友顏志恒(Benson)同何博文仲上台獻唱。

眼見一眾《中聲1》戰友撐場,泇霖都話非常感動,尤其原本喺外地旅行嘅Bill哥哥,都趕得切返嚟見證重要時刻,Bill哥哥都話能夠見證呢一刻都好開心,聽到泇霖演繹之後更加感動,佢仲話要再翻聽。丁文俊話首歌好有意思,能夠一路堅持音樂路到出歌,係好值得支持。

泇霖就話首歌係送畀媽咪嘅禮物,而活動當日更加係佢媽咪嘅正日生日,所以覺得成件事好感恩。佢話出歌唔容易,尤其係到佢呢個年紀,但只要堅持都可以做到。

見證住泇霖出歌既重要時刻,身為佢好友既一班《中聲1》戰友都好戥佢開心,尤其係識於微時既Benson,佢話當初係參加泇霖舉辦嘅民間歌唱比賽而認識,佢知道呢首歌其實係三、四年前已經有意推出,最終等到而家先面世。魏嘉信都話自己想講嘅嘢畀Benson講晒,不過唔同之處,係佢冇參加過泇霖搞嘅歌唱比賽。講到幾時出新歌,支嚳儀就話新歌MV已經做緊後期,Benson亦有幸先睹為快,佢都大讚拍得好好。

 相關推薦

熱門搜尋