賀歲劇《黃金萬両》即將喺年卅晚播出，呢日薛家燕就率領有份主演嘅Mayanne麥美恩、江嘉敏、朱智賢、馬貫東、黃子恆、林漪娸等，一齊去到大埔許願樹為劇集宣傳。

講到佢哋嘅新年新願望，Mayanne話自己個願望就係「快脫單」，家燕姐聽完雖然都忍唔住大笑，但佢笑完都有幫Mayanne賣下廣告，就話同對方合作完，覺得佢係個可人兒，又靚又醒又乖，所以家燕姐話佢冇理由要等，唯一嘅問題就係Mayanne工作太忙，所以家燕姐忠告佢，如果想快脫單就要抽返多啲時間陪對方。至於講到自己嘅願望，家燕姐就話希望「家有喜事」，希望佢兩個囡囡快啲有好消息，而囝囝就可以為佢湊多個孫呀。

相隔多年再拍賀歲劇，家燕姐話同呢班後輩合作得好開心，而Mayanne就溫馨提供大家，話初初睇劇嗰陣唔好較咁大聲，等適應咗先調返大聲啲呀。

馬貫東同江嘉敏喺劇中係歡喜冤家，劇中就成日打打鬧鬧，劇外佢哋一樣鬥唔停，馬貫東就話自己喺劇入面成日畀江嘉敏打，但江嘉敏就反擊話自己喺戲內打幾多，馬貫東都會喺戲外打返佢幾多。問到馬貫東拍完呢套劇之後有冇職位性失聰？佢就講笑話自己只係受損程，未去到失聰程度，仲話拍完劇之後冇見到江嘉敏之後就好返好多呀。

眾所周知「十字步」係家燕姐嘅拿手舞蹈，黃子恆同朱智賢就話同家燕姐拍完呢套劇之後，佢哋兩個唔只盡得真傳，「十字步」嘅步法仲提升咗去另一個層次，朱智賢仲話因為佢哋有首主題曲，所以考慮將「十字步」融入去隻舞度呀！

由薛家燕、曹永廉、麥美恩、黃子恆、朱智賢、馬貫東、江嘉敏及林漪娸等主演，一連8集賀歲喜劇《黃金萬両》喺年三十晚播出，呢日一班演員坐埋一齊拍團年飯場口，氣氛好熱鬧，佢哋更預告有歌舞表演。

薛家燕稱劇中3位新抱好有主張，不時喺屋企「大鬥法」，大新抱麥美恩咩嘢都唔好執輸、另一新抱江嘉敏喺劇中常為老公出頭、三新抱朱智賢經常護住老公，三位新抱各出其謀，喺奶奶家燕姐面對搏表現，亦有下廚比拼，麥美恩笑言扮唔識煮嘢食有難度，更叫佢煮得再差啲，而朱智賢本身唔識劏魚，由工作人員在旁教佢起魚鱗等，江嘉敏完全唔識煮嘢食，平日就鍾意同妹妹上網研究食譜試整。

拍攝當日天氣炎熱，男子組表演舞獅採青，黃子恆、曹永廉及馬貫東稱玩得好開心，舞獅頭嘅黃子恆覺得有少少食力，因為佢哋唔係練武之人；薛家燕同林漪娸合作過多套喜劇，呢次再合作，勾起佢哋好多有趣回憶，更一齊唱《皆大歡喜》前奏，二人由《真情》開始一齊拍，之後再拍《皆大歡喜》，家燕姐笑言合作有成千集，林漪娸指家燕姐冇拍劇好耐，今次係希望新年期間帶畀大家開心。