中年好聲音丨梁浩銓獻唱《灰色軌跡》 勾起單立文與黃家駒往事

歌唱真人騷《中年好聲音》 嘅20強，將會喺年卅晚播出嘅一集新行第三部曲次回合《影視金曲生死鬥》，20位選手以個人身份作賽，再由四大專業評審肥媽、周國豐、張佳添、伍仲衡，同埋嘉賓評審單立文評分。

呢個回合再有新賽制，首兩位出戰嘅選手完成表演之後，要企喺隔離等第三位選手嘅成績出爐，然後三位入面最高分嗰位可以直接晉級，另外兩位就跌落危險區。之後出戰嘅選手只要成績高過危險區嘅選手就可以直接晉級，企過嘅就要同危險區內較高分嘅選手「交換位置」。

今集出戰選手共有11位，分別為鮑聖光、涂家堯、何博文、李佳、李思林、魏嘉信、龍婷、梁浩銓、彭澤英、曹敏寶及丁文俊。而上星期爆出嘅黑馬涂家堯，今次以張學友嘅《月半彎》出戰，自信滿滿嘅佢喺表演期間不時派心，不過幾位評審似乎唔太受落，先係單立文說：「用真感情唱好首歌，我聽歌係合埋眼聽，唔睇呢啲花臣嘢。」而周國豐亦認同唔需要太多心心，仲話咁樣令成首歌嘅氣氛降低咗。

而當梁浩銓獻唱樂隊Beyond嘅《灰色軌跡》時，身為黃家駒死黨嘅單立文就相當感觸：「呢隻歌勾起我好多回憶，佢走嗰陣我喺佢側邊，家駒走咗嗰兩年，我聽到Beyond嘅歌係會無端端喺度喊，家駒嘅離開係香港Band壇好大嘅損失，如果你真係鍾意家駒，真係要 Study 多啲，幫佢延續黃家駒精神。」

至於「小龍女」龍婷今次就以Bling Bling歌衫上陣獻唱《甜蜜蜜》，佢話自己好鍾意《甜蜜蜜》入面張曼玉個角色，仲話個角色對佢影響好大。到底一眾嘅成績係啦？密切留意星期六播出嘅最新一集。

《中年好聲音》 為配合農曆新年節目安排，第八集將提前於21號星期六 年卅晚 21:30播出，而由1月29號起，則會逢星期日20:30播出。