有種好男人丨李佳芯處於擔憂狀態演多層次喊戲 吳偉豪趁機偷師不敢鬆懈

由李佳芯、馬德鐘及吳偉豪主演嘅《有種好男人》日前播出呢集劇情緊湊，講Woody（吳偉豪飾）遭匪徒綁架，被誤以為係富豪蔣定天（張國強飾）親生仔Terence，最後日正（馬德鐘飾）成功追尋至藏參地，救出Woody，混亂間遭匪徒拋落山，由日正孭住佢離開藏參地，二人感情邁進一大步，之後Woody被送往醫院搶救，突然發高燒兼腳部出現「壞死性筋膜炎」，隨時有機會要截肢。

李佳芯趕至醫院，得知兒子Woody病危呢一場戲，由內心焦慮緊張，到激動崩潰爆喊，一晚幾種唔同喊法，李佳芯一整晚處於擔憂狀態，演多層次喊戲，佢話幸好有故事背景，一路與兒子Woody建立感情，倍感親切，令到發生意外時，即演技大爆發，反而吳偉豪呢場演得好輕鬆，佢趁機向前輩偷師，即使拍臥床戲都不敢鬆懈。

李佳芯笑指之前拍《BB來了》，Madam Lo(盧宛茵)當時飾演嫲嫲，李佳芯目前見到盧宛茵都會嗌「嫲嫲」，隨住每一套劇對唔同對手加深感情，李佳芯表示：「好得意，有時見到啲同事，諗起之前同佢拍劇某一個角色，感情係咁，呢個地方就係咁得意，每一個人都有一個小故事。」