中年好聲音丨何廣沛朱智賢低調撐老友 豹哥指導參賽者勿揀梅姐家駒金曲

中年好聲音丨何廣沛朱智賢低調撐老友 豹哥指導參賽者勿揀梅姐家駒金曲

歌唱真人騷《中年好聲音》今個星期提早喺年三十晚播出,節目展開新一輪個人賽,20位參加者挑選影視金曲出戰,爭取晉級18強。

丁文俊唱陳百強金曲《當我想起你》,指最近睇日劇講初戀,令佢諗起讀書嘅初戀一段開心嘅往事,而魏嘉信唱林峯嘅《愛在記憶中找你》,因為太鍾意TVB劇,曹敏寶唱電視劇《大鬧廣昌隆》主題曲《抱緊眼前人》,呢首歌係由爸爸親自幫佢揀,希望大家聽到阿女嘅中低聲嘅特式。

上一回合團戰獲得最高分,丁文俊及魏嘉信坦言信心倍增,曹敏寶則不敢鬆懈,呢日好友朱智賢再次前來支持曹敏寶,何廣沛低調現身撐老友何博文,未有事先張揚,希望唔會畀對方壓力,何廣沛與何博文係中學同學,由中三開始認識,friend足20年,仲係波友同牌友,又會一齊約埋唱K,何博文於半年前更作曲畀何廣沛唱,稍後先拍MV放上網。

呢輪個人賽邀請豹哥單立文做嘉賓評判,佢對參賽者夾硬要挑戰極限歌,豹哥都會畀啲意見,指有啲歌唔掂得,因為只有原唱者可以handle,希望佢哋多加留意,用呢啲歌去參賽反而好蝕低,譬如梅姐梅艷芳同Beyond主音黃家駒嘅歌,豹哥坦言一講家駒有好多回憶湧現。

李泇霖推出首支單曲 獲《中年好聲音》戰友力撐支持

《中聲1》參賽者李泇霖舉行發布會,宣布推出首支個人單曲,獲前輩文佩玲、莫鎮賢同《中聲1》戰友吳大強(Bill哥哥)、丁文俊同支嚳儀、魏嘉信同柳冕等人支持,眼見家人朋友支持,泇霖都覺得非常開心,好友顏志恒(Benson)同何博文仲上台獻唱。

眼見一眾《中聲1》戰友撐場,泇霖都話非常感動,尤其原本喺外地旅行嘅Bill哥哥,都趕得切返嚟見證重要時刻,Bill哥哥都話能夠見證呢一刻都好開心,聽到泇霖演繹之後更加感動,佢仲話要再翻聽。丁文俊話首歌好有意思,能夠一路堅持音樂路到出歌,係好值得支持。

泇霖就話首歌係送畀媽咪嘅禮物,而活動當日更加係佢媽咪嘅正日生日,所以覺得成件事好感恩。佢話出歌唔容易,尤其係到佢呢個年紀,但只要堅持都可以做到。

見證住泇霖出歌既重要時刻,身為佢好友既一班《中聲1》戰友都好戥佢開心,尤其係識於微時既Benson,佢話當初係參加泇霖舉辦嘅民間歌唱比賽而認識,佢知道呢首歌其實係三、四年前已經有意推出,最終等到而家先面世。魏嘉信都話自己想講嘅嘢畀Benson講晒,不過唔同之處,係佢冇參加過泇霖搞嘅歌唱比賽。講到幾時出新歌,支嚳儀就話新歌MV已經做緊後期,Benson亦有幸先睹為快,佢都大讚拍得好好。

 相關推薦

熱門搜尋