鋪鋪Poker|尹光親解戒賭原因 諧音有味歌唱出處詳解

年卅大除夕播出嘅《鋪鋪 Poker》,除咗繼續有郭偉亮  方力申 陳欣茵 黃紫恩 同 譚焯升 主持之外,亦有一現身就必定有唔少歡笑嘅 尹光 擔任嘉賓。 尹光可以話係元祖級唱家班,佢嘅歌曲早喺70年代已經街知巷聞,又作曲填詞一腳踢,經典詼諧作品好似《數波波》、《數毛毛》、《少理阿爸》同《荷李活大酒店》等,不能盡錄。

今集佢應邀同Eric、方力申等主持交手,而一班後生仔亦非常欣賞尹光嘅作品,Eric就爆老婆葉佩雯(Grace)係Fans喇︰「佢喺屋企成日唱《數波波》同《少理阿爸》,知道尹光做嘉實,最開心係佢。」


尹光自爆當年嗜賭成性,曾喺澳洲閃電輸廿多萬尹光自爆當年嗜賭成性,曾喺澳洲閃電輸廿多萬
而Sonya同Clevis話每次去卡拉OK,《荷李活大酒店》同《少理阿爸》都係必唱之選。 而尹光本尊一出場即刻數白欖自我介紹,又指自己70年代已開始賭啤牌,仲試過玩啤牌輸咗層樓,佢話︰「79年去澳洲悉尼登台順便學車,有日個教車師傅冇到,無聊走去私家賭檔玩。嗰時一層樓20幾萬港元,一陣已經輸咗20幾萬。其實我邊有咁多錢輸,唱一個月都係4000美金,不過因為我係尹光,佢哋咪信我,返到香港慢慢還。」

尹光話賭癮最大時,乜都可以賭一餐,喺英國賭銀紙號碼、的士車牌,幾乎所有歌酬都進貢 賭檔。直到84年因為一場賭局,先決定金盆洗手。佢話當時喺上海街一間大檔賭十三張,眨眼已欠賭檔5萬,賭檔講明會去佢登台嘅夜總會收數,嚇到佢一身冷汗,擔心連工都冇埋。

最後佢用咩方法即晚還清賭債?又係咩促使佢自此戒賭絕跡大檔呢?記得食完團年飯坐定定睇《鋪鋪Poker》喇。

至於呢晚嘅牌局,由尹光一向抵死兼略為「有味」嘅對話生色不少,第一鋪就被方力申同Eric 夾攻而敗北。心有不甘嘅佢即刻提出同Jojo結盟,仲笑住話︰「我同你一陣『夾』返佢(Eric),你唔識『夾』㗎?咁你要學 『夾』嘞,好緊要呢下嘢,你要學識『夾』男人至搵得到。」Jojo聞言只好笑笑口話「知道」。 

之後尹光又繼續拉攏Sonya夾攻方力申,而佢最耍家嘅有味笑話,大家都想班解佢抵死啜核歌詞嘅靈感來源,而佢亦有問必答,原來《荷李活大酒店》除咗歌詞「三個肥婆六個波……」有味版之外,其實有唔同嘅優化版︰「呢隻歌好多人都認為鹹濕,得一句歌詞嘅啫,我作嚟作去都作唔到,開頭係用『六個阿哥』、 『六隻梳』……」。當然仲有view數超過600萬嘅《少理阿爸》,尹光原本想推,不過最後就因為一個理由答應唱,仲因而爆紅。節目就會話你知,呢首「粗製濫造」嘅 MV點樣煉成喇。

 相關推薦