滕麗名近年喺《愛回家之開心速遞》演「熊尚善」,角色深入民心,噚日1月20號滕麗名47歲正日生日,撞啱要同一眾藝員同事出發去澳門準備今日舉行嘅《獎門人開心迎兔年百老匯》,與廣大觀眾送虎迎兔共賀新歲,滕麗名一向圈中人緣甚佳,食飯嗰陣,佢哋跟滕麗名慶祝並影大合照,見曾志偉、錢嘉樂、湯盈盈、江美儀、麥美恩、JW、呂慧儀、丁子朗、郭柏姸、阮兆祥、單立文及陳浚霆。
《愛.回家》台前幕後早前為滕麗名慶祝生日之外,「安仔」周嘉洛亦有抽時間送驚喜畀「Mami」滕麗名,更唱埋生日歌,見滕麗名收到蛋糕好開心,周嘉洛雖然暫時離開《愛.回家》劇組,但係佢同「媽咪」滕麗名關係勁好;滕麗名日前有跟老公朱建崑食飯,見佢哋摸酒杯底撐枱腳,滕麗名大爆老公由相識至結婚9年,一直好堅持唔買生日蛋糕,更hashtag笑指「激死人系列」,查實平日見佢同老公咁恩愛,應該都好夠甜啦!