中年好聲音|年卅繼續金曲激鬥 鮑大人二家姐入危險區 龍婷《甜蜜蜜》爆出83分佳績

中年好聲音|年卅繼續金曲激鬥 鮑大人二家姐入危險區 龍婷《甜蜜蜜》爆出83分佳績

因為歲晚節目調動,年卅晚播出嘅第八集《中年好聲音》,20強選手繼續「影視金曲生死 鬥」,以經典電影或劇集金曲比賽,經過一輪激戰之後,誕生咗三名超過80分嘅選手, 分別係何博文、李佳同龍婷,而鮑聖光同李思林就雙雙跌落危險區。

以靚聲聞名嘅「鮑大人」鮑聖光獻唱陳百強嘅《一生何求》,可惜表現未如理想,連環忘詞出現嚴重失誤,伍仲衡話:「一路聽都好辛苦,見到你又辛苦,我哋聽又辛苦,啲高音去唔到,係夾硬飆上去。」而張佳添則話:「唱甩歌詞唔係問題,甩咗旋律先係問題。」而肥媽就表揚鮑大人嘅執生功力,讚佢:「你有樣嘢好,你作歌詞,真係要畀掌聲佢,唔係人人做到,你作都唔緊要,最緊要唱到落去。」曾兩度奪得五燈嘅鮑大人,最終只得61分成為全晚最低分選手。


鮑大人表現失準只得全場最低61分
至於獻唱《明日天涯》嘅「二家姐」李思林,就被伍仲衡批評揀錯歌兼有音準問題:「你嘅處理手法擺落隻歌度係完全唔啱,你應該唱啲小調、溫柔啲嘅歌,會更加容易感動到我哋。」二家姐最終只得65分,同鮑大人一齊跌入危險區。

至於三位得分超過80分嘅選手中,同為歌唱導師嘅何博文同李佳同樣獲得81分高分,當中獻唱《如果可以》嘅博文就被指唔識揸咪,肥媽峝:「你支咪擺得唔好,揸咪係前面嗰度入聲。」肥媽仲場唱「嘥氣」示範拉咪。

而同博文相識多年嘅何廣沛呢日亦到場為好友打氣,廣沛話:「同佢係相識接近廿年嘅好兄弟, 今次純粹係嚟支持佢,唔想畀咁多壓力佢。」


何廣沛現身為廿多年老友博文打氣
而以黑白打扮上陣嘅李佳獻唱《白天不懂夜的黑》台風十足,獲肥媽大讚識用咪,不過演唱時感情欠奉,周國豐批評話:「服裝好配合首歌,同埋你把聲係幾啱唱呢首歌,奈何感情上要加啲苦功。」

李佳呢集亦都表現不俗

至於以鄧麗君腔出名嘅「小龍女」龍婷就獻唱《甜蜜蜜》,仲獲得全晚最高嘅 83 分,肥媽仲大讚:「佢唱歌時好Enjoy、好Sweet,其實唱歌好簡單,你Enjoy人哋就會Enjoy。」對於龍婷指原本唔敢以鄧麗君歌曲出賽,豹哥單立文就話:「其實唱鄧麗君冇咩唔好,我哋天后阿菲(王菲)都畀佢影響得好深。」

「小龍女」龍婷以出色表現成為全晚最高分參賽者

李佳與家人春節遊台北 樂與姨媽元宵前相聚

《中年好聲音》歌手 李佳 同一眾粉絲抓緊正月小尾巴,趁住仲係過年時節搞咗一個春茗聚會,一齊唱吓歌、寫吓揮春、派吓禮物,仲有紅色衫dress code,一於延續新年喜氣氣氛。

早前新年假期,佳佳就同一家人去台灣旅行,講返呢段旅程令佳佳好開心。初次到寶島旅遊嘅佳佳就喺台北盡情吃喝玩樂,不過佢嘅行李箱唔係擺滿食物同靚衫,而係當地夾公仔機嘅公仔啊!

另一件令佳佳好開心嘅事,就係佢姨媽趕喺元宵節前由上海來港同佢相聚。佳佳就話姨媽對上一次來港已經係中聲決賽嘅事,呢次姨媽見到佢比之前更進步、得到更多幕前演出機會,都為佢覺得自豪啊。

 相關推薦

熱門搜尋