中年好聲音|年卅繼續金曲激鬥 鮑大人二家姐入危險區 龍婷《甜蜜蜜》爆出83分佳績

中年好聲音|年卅繼續金曲激鬥 鮑大人二家姐入危險區 龍婷《甜蜜蜜》爆出83分佳績

因為歲晚節目調動,年卅晚播出嘅第八集《中年好聲音》,20強選手繼續「影視金曲生死 鬥」,以經典電影或劇集金曲比賽,經過一輪激戰之後,誕生咗三名超過80分嘅選手, 分別係何博文、李佳同龍婷,而鮑聖光同李思林就雙雙跌落危險區。

以靚聲聞名嘅「鮑大人」鮑聖光獻唱陳百強嘅《一生何求》,可惜表現未如理想,連環忘詞出現嚴重失誤,伍仲衡話:「一路聽都好辛苦,見到你又辛苦,我哋聽又辛苦,啲高音去唔到,係夾硬飆上去。」而張佳添則話:「唱甩歌詞唔係問題,甩咗旋律先係問題。」而肥媽就表揚鮑大人嘅執生功力,讚佢:「你有樣嘢好,你作歌詞,真係要畀掌聲佢,唔係人人做到,你作都唔緊要,最緊要唱到落去。」曾兩度奪得五燈嘅鮑大人,最終只得61分成為全晚最低分選手。


鮑大人表現失準只得全場最低61分
至於獻唱《明日天涯》嘅「二家姐」李思林,就被伍仲衡批評揀錯歌兼有音準問題:「你嘅處理手法擺落隻歌度係完全唔啱,你應該唱啲小調、溫柔啲嘅歌,會更加容易感動到我哋。」二家姐最終只得65分,同鮑大人一齊跌入危險區。

至於三位得分超過80分嘅選手中,同為歌唱導師嘅何博文同李佳同樣獲得81分高分,當中獻唱《如果可以》嘅博文就被指唔識揸咪,肥媽峝:「你支咪擺得唔好,揸咪係前面嗰度入聲。」肥媽仲場唱「嘥氣」示範拉咪。

而同博文相識多年嘅何廣沛呢日亦到場為好友打氣,廣沛話:「同佢係相識接近廿年嘅好兄弟, 今次純粹係嚟支持佢,唔想畀咁多壓力佢。」


何廣沛現身為廿多年老友博文打氣
而以黑白打扮上陣嘅李佳獻唱《白天不懂夜的黑》台風十足,獲肥媽大讚識用咪,不過演唱時感情欠奉,周國豐批評話:「服裝好配合首歌,同埋你把聲係幾啱唱呢首歌,奈何感情上要加啲苦功。」

李佳呢集亦都表現不俗

至於以鄧麗君腔出名嘅「小龍女」龍婷就獻唱《甜蜜蜜》,仲獲得全晚最高嘅 83 分,肥媽仲大讚:「佢唱歌時好Enjoy、好Sweet,其實唱歌好簡單,你Enjoy人哋就會Enjoy。」對於龍婷指原本唔敢以鄧麗君歌曲出賽,豹哥單立文就話:「其實唱鄧麗君冇咩唔好,我哋天后阿菲(王菲)都畀佢影響得好深。」

「小龍女」龍婷以出色表現成為全晚最高分參賽者

古淖文獲評判一致畀滿分封冠軍 譚輝智屈到病舞姿成亮點

歌唱選秀節目《中年好聲音2》24號舉行「登峰之戰」總決賽,古淖文憑住佢拿手嘅英文歌《Feeling Good》,獲得所有評判一致畀出20分,以總分99分成為冠軍。古淖文話賽果完全出乎意料,當見到所有評判畀出20分時,嗰種心情真係好震撼。

而屈居亞軍嘅譚輝智唔止無失落,仲大讚古淖文係「值嘅」,而佢自己喺快歌環節嗰首《屈到病》就成為全晚最多人討論嘅亮點,唔擅長跳舞嘅譚輝智,話自己嘅舞姿一定唔會型,所以佢就決定以搞笑風格上場,尹新杰仲以「好得意」嚟形容佢嘅舞步呀!

一直被視為大熱嘅顏米羔,雖然最後成為季軍,但佢都話自己已經心滿意足喇,事關佢話覺得名次對佢嚟講唔重要,最重要係可以爭取機會唱歌。而黃劍文就以些少差距未能晉身三甲,不過對於好朋友台灣歌手張芸京特登飛嚟香港撐場,劍文就覺得好感動,仲話芸京喺音樂呢條路上一直鼓勵自己,兩人仲感動到互相抱抱呀。

至於安雅希、沈宗賢同埋陳俞霏就話行到決賽呢一步,已經心滿意足,幾位仲話經歷長達八個月嘅賽事,終於告一段落,佢哋嘅心情既放鬆又唔捨得。

評審之一嘅伍仲衡,一向比分都好手緊,但決賽夜佢竟然將自己第一個20分比咗古淖文,肥媽都好認同,話古淖文絕對係無可挑剔嘅演出。

決賽夜《中聲》嘅師兄師姐都有嚟觀戰,周吉佩、李佳同羅啟豪都大讚參賽者演出超水準,顏志恒仲話對譚輝智跳嘅《屈到病》非常深刻,劉威煌就講笑話遲啲可能變成廣場舞。對於蔡琴以嘉賓身份現身,就令大家相當驚喜,佢仲獻唱咗經典歌《你的眼神》令樂迷大飽耳福。

決賽夜結束後,一眾粉絲喺電視城門外等候偶像,米羔、輝智仲有劍文更親自出嚟答謝歌迷嘅支持。

 相關推薦

熱門搜尋