歌神4月舉行紅館演唱會 過半門票只需380

歌神許冠傑大年初一就為大家帶嚟好消息!佢宣佈嚟緊4月將會喺紅館舉行演唱會呀!而為咗可以與眾同樂,Sam更加將至少一半門票定價為$380!

已經有一段時間冇開演唱會嘅歌神許冠傑,早前宣傳將會舉行巡迴演唱會嘅馬來西亞站後,各地歌迷都表示相當羨慕。歌迷嘅訴求阿Sam當然聽到啦!佢喺大年初一就宣佈,將會落實喺4月於紅館舉行個唱!Sam仲話過往佢嘅演唱會係會有現埸點唱環節,只要歌迷想聽邊首歌,佢就會即席拎起結他演唱,又會嚟個全場大合唱;但係佢之前嘅網上演唱會,就冇咗互動性,淨係得佢唱歌畀觀眾聽,所以佢希望到時個演唱會,可以重溫呢個溫馨時刻。

向來都了解民間疾苦嘅Sam,知道呢幾年嘅疫情令大家都唔開心,加上經濟又唔太好,所以佢為咗令大家可以放鬆一晚,Sam決定喺演唱會嘅票價上回饋大家,每場至少會有一半票價將定價低至$380,希望令更多樂迷可以喺經濟許可嘅情況下,一起入場大合唱,實行與眾同樂。

 相關推薦