新春開運王｜陳定幫師傅帶路行大運 麥玲玲山頂吸天地靈氣

賀年節目《新春開運王》喺新春期間繼續教大家開運順利過新年，今晚大年初二嘅一集， 陳定幫 師傅就會帶大家去大埔白石角行大運，幫幫師傅更會喺節目解構白石角風水特別好嘅原因。

之後幫幫師傅再同大家一齊去文武廟，解開拜文昌唔止可祈求學業運，文昌星亦代表住名譽同競爭，而同行嘅 郭柏妍 徐文浩 陳懿德 仲乘機許下兔年願望呀。早前一唱驚人嘅Rosita就好緊張幾時可以擺脫魔音污名，陳懿德就問到自己幾時可以上位成為「麥美恩2.0」，兩位靚女兔年願望可唔可以成真，就要留意今晚節目喇。 

而 李家鼎 同 Bob林盛斌 又會齊齊食 「新春開運菜」，多仔公阿Bob仲被指今年同老婆會 有拗撬，仲有機會再添新家庭成員呀！ 

至於聽（24日）晚年初三， 麥玲玲 師傅會率領大家齊齊上山頂吸收天地靈氣，又會分析山頂、中半山同山腳嘅風水優劣之處。至於「開運有『元』機」環節， 元海 師傅會教大家打麻雀開運法，致勝之道仲同衣著顏色有關。

而 崔建邦(Amigo)同 黎諾懿 應邀食「新春開運菜」，命格屬木嘅Amigo就被玲玲師傅批大起大落似賭仔命，Amigo又借機向玲玲師傅道謝：「以前遇過一次重大挫折，嗰時搬到好遠，玲玲師傅都專登過嚟安慰我、幫我睇(運勢)，呢件事擺咗喺心好多年，終於可以喺鏡頭前多謝你。」 至於諾懿就被指兔年宜挑戰冷門事物同往東邊發展喇。

《新春開運王》星期一至三晚 22:30 翡翠台