Gigi接連現身央視大灣區春晚 偷閒抽時間陪家人過年

Gigi炎明熹 自去年參與音樂節目《聲生不息》之後，人氣就喺內地急升，出道僅年幾嘅佢仲獲邀參與晚中央台嘅春節聯歡，為全國觀眾表演除舊迎新歲。當晚Gigi身穿紅色連身裙，同一班前輩演員歌手一齊演唱歌曲，盡顯青春活力。演出後Gigi仲同工作人員一齊品嚐餃子，共嘗遲來的「團年飯」。

首次踏上春晚舞台嘅Gigi話自己心情既緊張又榮幸，有機會喺全國觀眾面前高歌，係人生難得嘅經驗。Gigi仲透露一眾表演單位為演出不斷綵排，無論喺年舞台定休息室都一直落力排練，希望為觀眾帶嚟最精彩嘅演出。

Gigi為演出亦都花盡心思，喺學校有選修服裝成衣與紡織及視覺藝術科嘅佢，就學以致用發揮設計天分，同設計師一齊設計身上嘅紅色連身裙，除咗喺領口加上大紅花以配合春晚「花」嘅主題外，Gigi亦加入兔年元素，喺盤扣加上兔耳增添可愛青春感。

而除咗央視春晚外，Gigi亦獲邀參與大年初一播出嘅廣東衛視大灣區春晚節目，一連參與兩個大型春晚活動，就令Gigi呢個農曆新年過得特別難忘喇。
 
除咗接連喺兩大春晚演出外，Gigi又先拔頭籌獲頒微博音樂盛典嘅「年度新銳歌手」同憑歌曲《蜚蜚》勇奪2022年QQ音樂巔峰榜嘅「綜藝年度最佳舞台獎」，Gigi對獲獎表示開心又榮幸，佢話：「感恩有每一位陪伴著我的人，因為有大家才會有我，所以真的很感謝你們，亦很感恩在路途上遇到的每一位音樂人、各位老師、朋友等等。」

一向孝順嘅Gigi不忘感激家人一直以來對自己嘅支持同照顧，仲話會繼續努力，希望今年一樣會有好成績。Gigi雖然行程緊密，不過就難得可以同家人聚首，百忙之中一齊度過農曆新年。佢又趁機會向Fans拜年：「祝大家身體健康，順順利利，做到自己最想做的事情。」