燈火闌珊丨周漢寧與張艾嘉互動感動觀眾 自備道具試鏡打動導演奪男一機會

電影《燈火闌珊》早前舉辦多場優先場，戲中任達華飾演霓虹燈師傅鑣叔，其有一位徒弟仔Leo係由首次擔任男主角嘅周漢寧飾演。阿寧與張艾嘉嘅互動帶嚟唔少感人場面，不少觀眾被感動流淚，其實周漢寧用心對待角色，成功打動導演才獲得呢次機會。

周漢寧試鏡時，自備咗一個自製嘅精美面具，以及霓虹燈光管，令導演覺得呢位演員好有誠意參加試鏡，周漢寧解釋道具可以令佢演得更到位：「主要因為想喺試鏡時可以更加表現到我對呢套戲、呢個角色嘅想像，對我嚟說，道具影響演出嘅節奏，或係演出時嘅視線，所以作為演員，呢個準備工具其實更能表現自己，導演於試鏡翌日再邀阿寧嘗試製作霓虹燈，發現佢肢體動作都有板有眼，便落實由阿寧去演徒弟仔。
 

周漢寧首次擔任男主角，更要與演出經驗豐富嘅張艾嘉對戲，阿寧自然不敢怠慢，難得佢表現得到張姐嘅嘉許。張艾嘉指周漢寧似呢個角色，令人感覺舒服，有個人特色，日後可以嘗試更多不同角色，周漢寧能得到重量級前輩看重，阿寧自然興奮，亦好感謝張姐嘅愛錫。周漢寧於片場裡多得導演照顧，令佢喺演出嗰陣不會鑽牛角尖，周漢寧最深刻係情緒爆發嘅戲份，導演都感受到周漢寧好緊張，於是拉佢埋一邊，然後讓佢靜落嚟，回想角色本身「基調」，當下佢可以放低壓力，滿有感受嘅回到片場，再與對手一來一回嘅演下去，結果就OK，導演喺拍攝路途中都好體貼，幫助好多，所以周漢寧非常感謝導演。
 

回顧過去一年，大批新演員湧現，令今屆金像獎最佳新演員嘅競爭變得甚為激烈，周漢寧卻為此而感到興奮：「今年有好多新演員，作為一分子係好開心，因為當電影圈愈來愈多新人加入，就愈生氣勃勃，亦更加有活力，因為當你睇到呢個圈子愈來愈多不同質地、不同性格嘅演員，然後可以同佢哋作出思考碰撞，一同交流，呢件事係好美麗！而且令到影圈更加有創意，所以我係開心嘅。」