陳煒 一向都煮到一手好餸，據報食過煒哥手勢嘅朋友所講，無一唔大讚Very Good，煒哥去年底出嫁成為醫生夫人，今年就自然要準備一枱豐盛佳餚過年啦，不過新年期間佢仲心掛掛另一個月，仲話一定要同佢食餐飯先安樂咁講喎。

原來煒哥同Gigi炎明熹 自《青春本我》扮演一對母女之後，就成為好朋友，煒哥仲話自己都係Gi炎粉嘅一員呀。呢日 王鎮泉 就特別安排《煮戰》冠軍名廚阿Ken，為煒哥同Gigi安排好好嘆返一餐賀年西餐喇。

煒哥就話每年都會親手為親友下廚煮幾味，無論花膠鵝掌定鮑魚，定係各式賀年糕點都難佢唔到。而Gigi雖然年紀輕輕，不過蛋類嘅各式烹調方法呢，Gigi就話自己都土算有研究咁話喇。

煒哥又話因為媽咪係北方人，所以過往都會同埋家姐媽咪齊齊包餃子過年，最重要係當中一齊傾偈分享過往一年嘅大小事，係非常重要嘅共聚天倫時刻。

而媽咪同樣係北方人嘅Gigi一樣會幫媽咪擀餃子皮，難怪Gigi話一提起就有細個嘅回憶湧現啦，加上佢同煒哥連家鄉都非常接近，所以煒哥就話同Gigi真係非常有緣又微妙喇。

當初拍攝《青春本我》初次見面，Gigi就話心情戰戰兢兢，不過煒哥就大讚Gigi文靜又乖巧喇。

Gigi嘅火星思考同表方式令外界有時覺得稍難觸摸，不過煒哥就話自己完全免疫，非常易明白咁話喎。扮演母女嘅佢哋雖然拍攝時只係得3日時間，不過煒哥就話因為自己係真•Fans，所以非常快就投入成為好似真母女咁喇。

而加速佢哋熟悉嘅契機，仲係因為萬歲叫糖水，Gigi嘅選擇困難症令煒哥覺得呢位小妹妹更加有趣，仲變得更加疼錫呢個女呀。

Gigi舊年喺歌唱發展唔錯，不過戲劇方面佢就話想再儲多啲經驗先再挑戰，但係早前佢客串《愛•回家之開心速遞》時，就非常擔心自己會浪費同場嘅大家時間，仲話見到丹爺 劉丹仲被撩傾偈，又有豹哥請食糖，感覺非常親切呀。

Gigi今年終於可以回鄉過年探親，令佢非常期待，仲非常期待舞獅放炮仗嘅氣氛喇。

而煒哥就話希望有機會演出一部烹為主題嘅劇集，仲希望食過佢食物嘅人都有療癒嘅感覺呀。

年度大型籌款節目《博愛歡樂傳萬家》11號圓滿舉行，大班歌手分為紅藍兩組為節目表演募集善款，其中 Gigi炎明熹就先後表演 梅艷芳 經典金曲，又同 曾比特 合唱，更加現場首次獻唱新歌《大開眼界》呀。

4月就正式成年18歲大個女嘅Gigi，就話希望自己可以再生得高啲，身形比例可以更好喎。除此之外又希望可以展開個人音樂會，可以同歌迷朋友一齊聚會玩返晚，不過首先就係要好好準備嚟緊嘅公開試喇。

而 林敏驄 早前公佈自己紀念演唱會嘅嘉賓名單，Mike曾比特亦榜上有名，呢日佢就話非常開心有份參與呀，而稍後就會舉行嘅張國榮紀念演唱會，Mike同都會上台表演，佢就話更加期待當日同其他前輩同台呀。

而 JW 呢日性感打扮現身之餘，仲有一頭為《痞子無間道》剪嘅短髮，佢仲話早知再早啲剪氳，因為清爽又舒服呀。而 吳業坤 亦都準備開新劇，仲會同 王敏奕 合作，仲話好在冇乜感情戲，自己身唔使同太太解釋呀。

海俊傑 呢日就同 冼靖峰 重現佢29年前參加新秀比賽嘅升Key場面，而同屆嘅亞軍 丁文俊 參與《中年好聲音》，海仔就話一直有留意對方表現喇。

Gin Lee呢日就以野性造型表演佢嘅快歌，但係原來表演前一日綵排後Gin Lee嘅手機失蹤，好在最後有好心人送交保安，先令佢舒一口氣咋。