近年少有嘅一對娛樂圈姊妹花，呢日一齊現身為我哋拍攝新年專題，講嘅就係曾身為韓國前組合CLC嘅香港成員 莊錠欣 同我哋主播同事家姐 莊易羚 喇。呢日佢哋齊齊拍攝由頭笑到落尾，而事隔幾年之後再喺香港同家人一齊過年嘅Elike，仲話好想向恩師 薛家燕 拜年呀。

Elkie就話同家姐幾年冇見，新年一定要借機會打吓交同嗌吓交增進返姊妹情，嚇到家姐耍手擰頭，仲爆Elkie係年糕怪一名，不過大家都一樣會為佢日日煎糕由佢食到夠咁話。

佢哋又話每年都會喺屋企貼自己寫嘅揮春，仲要一家人大戰四方城，不過Elkie就通常都係負責做站長嗰個嚟喇。雖然甚少有機會同場合作，不過呢日佢哋姊妹花就話，希望可以喺音樂上有合作機會，又一個唔覺意爆出兩姊妹都係吃貨，拍攝飲食節目一定冇問題咁話，Elkie仲話有機會喺TVB演出劇集，咁到時姊妹就可以成日見面喇。

TVB藝員同事近來輪流參與直播帶貨嘅主持任務，呢日 黎諾懿 就同 林鈺洧 仲有 郭柏姸合作開Live，仲大讚Rosita嘅中文中平非常高，而Rosita就話要跟諾懿學煮食技巧喇。

不過直播唔多唔少都要以普通話介紹產品，有「港普之父」美譽嘅諾懿，就考唔起兩位靚女，但係Denice就話全程都係靠諾懿為自己壯膽，對方一行開就已經心慌慌喇。

其實佢哋今次為直播一早就已經做足準備，了解各種推廣產品嘅資料，但係到實際主持時諾懿就話預到另一問題，仲話合作嘅都係靚女令自己好難專心呀。