莊氏姊妹花同場現身 莊錠欣誤爆姊妹不和

莊氏姊妹花同場現身 莊錠欣誤爆姊妹不和

近年少有嘅一對娛樂圈姊妹花,呢日一齊現身為我哋拍攝新年專題,講嘅就係曾身為韓國前組合CLC嘅香港成員 莊錠欣 同我哋主播同事家姐 莊易羚 喇。呢日佢哋齊齊拍攝由頭笑到落尾,而事隔幾年之後再喺香港同家人一齊過年嘅Elike,仲話好想向恩師 薛家燕 拜年呀。

Elkie就話同家姐幾年冇見,新年一定要借機會打吓交同嗌吓交增進返姊妹情,嚇到家姐耍手擰頭,仲爆Elkie係年糕怪一名,不過大家都一樣會為佢日日煎糕由佢食到夠咁話。

佢哋又話每年都會喺屋企貼自己寫嘅揮春,仲要一家人大戰四方城,不過Elkie就通常都係負責做站長嗰個嚟喇。雖然甚少有機會同場合作,不過呢日佢哋姊妹花就話,希望可以喺音樂上有合作機會,又一個唔覺意爆出兩姊妹都係吃貨,拍攝飲食節目一定冇問題咁話,Elkie仲話有機會喺TVB演出劇集,咁到時姊妹就可以成日見面喇。

影視博覽大型發佈會任司儀 黃庭鋒緊張冒汗將加入拍劇

近日舉行嘅影視博覽,唔同機構先後發佈咗大量新片同新劇,呢個業界年度盛事活動繁多,而 黃庭鋒 就為其中多個活動擔任司儀,表現亦非常唔錯,不過佢受訪時就自爆其實緊張到不得得了,仲話見到咁多巨星狂冒冷汗,對自己係極大挑戰呀。

雖然今次係司儀,過往又主要為唔同節目做主持,不過庭鋒就預告今年會加入劇組拍劇,仲係同「國粹」打麻雀有關,不過就話要好好鑽研牌技應付演出喇。

 相關推薦

熱門搜尋