黃金萬両|家燕姐劇透同李成昌有激烈kiss戲 麥美恩笑言自己多咗好多奶奶

黃金萬両|家燕姐劇透同李成昌有激烈kiss戲 麥美恩笑言自己多咗好多奶奶

俗語話「年初四咁嘅樣」,係因為初四放完假要返工,但如果年初四見到萬家呢家人,相信大家都會好開心呀!呢日薛家燕率領Mayanne麥美恩、朱智賢、江嘉敏、曹永廉、黃子恆、馬貫東同徐榮,嚟到鑽石山為劇集《黃金萬両》宣傳,佢哋仲即場獻唱劇集主題曲,家燕姐當然帶騷下佢拿手嘅十字步啦,睇到台下觀眾非常開心。

活動後家燕姐接受訪問,就話因為之前慈善活動有排練過,加上嚟緊3月會同同劇部份演員去登台,所以都有練定啲舞步先。家燕姐又過套劇出街後反應好好,Mayanne就話而家出街好多人都會叫佢做「大家嫂」,笑言自己突然多咗好多奶奶呀。

講到劇中嘅難忘事,家燕姐就劇透佢嚟緊會同李成昌有場激烈嘅kiss戲呀:「古裝拍kiss戲就唔多,以我咁嘅年紀拍kiss戲我諗就少喇!」家燕姐指因為導演話係喜劇,加上李成昌又「慫恿」,所以就有呢場戲出咗嚟,而喺旁邊嘅Mayanne就追問係一場蜻蜓點水式嘅kiss戲?定係車輪式?家燕姐就笑言係激烈嘅、一路轉嘅,仲話觀眾睇到一定會O晒嘴呀!係咪聽到都好想睇?但係家燕姐就話唔知會唔會激得滯,最後導演剪走咗,所以佢都係要睇先知到有冇剪到。

喺劇中有場戲就係朱智賢要孭住扮財神嘅老公黃子恆,點知拍攝當日就發生咗單笑料,朱智賢話因為當時要孭起着住財神衫嘅黃子恆,但當時佢feel到有嘢「哽」到佢,令到朱智賢大嗌:「好痛呀!你條嘢『哽』到我呀!」黃子恆就解釋係當時自己身上件財神衫、嗰條竹做嘅腰帶頂住朱智賢咋!

其實睇演員名單都知拍攝現場有幾嘈,呢日做訪問嗰陣,萬家兩位新抱再施音波功,令馬貫東都擰晒頭叫投降呀!

Mayanne小喇叭丨「細細粒」陳嘉佳帶貨直播闖出一片天 梁競徽感謝TVB過往磨練

由麥美恩同曾展望主持嘅TVB節目《Mayanne小喇叭》,呢集請到瘦咗又靚咗嘅小寶陳嘉佳同埋梁競徽做嘉賓,小寶同競徽近年轉換跑道,積極開拓直播帶貨市場,賺到豬籠入水,不過要賺呢啲錢都認真唔容易。

小寶話因為對自己要求高,所以做直播要付出嘅努力絕非外人能夠想像,而競徽都話直播好睇但唔易做,辛苦程度係一般人睇唔到,雖然佢都坦言相比帶貨,自己都係鍾意拍戲多啲,但既然選擇咗要做帶貨直播,就一定會努力做到最好。而競徽仲話自己可以勝任帶貨呢個工作,真係要多謝TVB過去嘅磨練。

瘦身成功嘅小寶已經有成四年冇返TVB拍劇,小寶拍劇團火似乎俾目前工作撲熄咗,事關佢而家成個工作模式係生意行先,如果要變返拍劇模式可能需要唔少時間適應,暫時佢都係專注帶貨先!

 相關推薦

熱門搜尋