台劇《想見你》喺2019年播出時樂評如潮，之後更翻拍成韓國版，而延續電視劇故事嘅電影版《想見你》，亦喺2022年開拍，三位主角柯佳嬿、許光漢同施柏宇繼續佢哋嘅愛情故事。

早前電影喺台灣上映，即成為當地開畫票房冠軍，農曆新年前全台票房破億。而香港電影發行公司，亦宣佈《想見你》電影版將於情人節檔、2月9日喺香港上映，而片中三位主角柯佳嬿、許光漢同施柏宇，亦落實將於2月4至6號嚟到香港進行宣傳！

對於可以再次到訪香港，柯佳嬿同施柏宇都話相當期待，特別係香港嘅美食，施柏宇就話自己好想食點心，不過由於只喺香港逗留3日，所以佢唔知到時有冇時間去食。而柯佳嬿就話好想去茶餐廳食菠蘿油同飲凍奶茶，又想食下街邊小食，但講到最希望去嘅地方，平時都有踩開板嘅柯佳嬿，就指好想去香港嘅滑板場睇吓。

而首次嚟香港嘅許光漢，就話自己好期待呢次香港之旅：「香港的朋友，『逮嘎吼』（大家好）！之前不管是網路還是信件，都有收到很多香港朋友和粉絲的心意，真的很謝謝你們的喜愛。很期待與你們相遇，到時跟你們說說話聊聊天。」

《想》劇播出時正值疫情，所以喺三年後可以將劇集變成電影版，再嚟到香港同觀眾見面，三位主角都非常感觸，佢哋多謝大家嘅支持外，亦祝願新一年大家都可以身體健康。

出道26年嘅 Tanya蔡健雅 ，今年終於舉行首個紅館演唱會， 呢日佢接受 許文軒 《StarTalk》嘅訪問，大談首次踏足紅館嘅感受。

Tanya笑言感覺自己等咗一輩子先等到喺紅館開騷嘅機會，同時亦覺得喺紅館開騷係一輩子一定要做嘅事，而家呢件事終於要實現喇，所以Tanya話佢嘅心情係 非 常 興 奮！

其實喺九年前Tanya本身已經有機會喺紅館開騷，但當年因為開騷前不慎病倒， 令呢個演唱會無奈叫停，Tanya坦言當時自己都懷疑人生、懷疑自己，覺得咁難得嘅機會就咁白白浪費咗，加上身邊嘅朋友大部份都已經踏上咗紅館呢個舞台，所以令佢相當懷疑自己，佢仲笑言因為咁而帶畀自己好大程度嘅創傷。

有過之前嘅慘病經歷，今次舉行紅館演唱會，Tanya話會特別注重健康。事實上近年Tanya嘅生活都變得健康咗，以往要凌晨4、5點先瞓嘅佢，而家變得早睡早起，連同之前喺台北舉行嘅演唱會開場時間都提早咗，Tanya笑言佢嘅演唱會儼如「養生俱樂部」，大家睇完演唱會仲可以去食個宵夜。雖然聽落好似好完美咁，但Tanya話將演唱會提早舉行嘅呢個方式真係唔太啱佢，仲話以後都唔會再考慮提早開騷呀！

數年嘅疫情令到大家心情都曚上陰霾，Tanya坦言呢幾年嘅疫情都令自己情緒變得低落，連音樂創作都提唔起興趣，所以佢將心思轉去其他地方，好似開始勾織不同小物、做園藝、食物雕刻及沖咖啡等，當中園藝種植更加係治療咁Tanya嘅身心靈呀！